سیدنا اسود بن سریع تمیمی رضی اللہ عنہ فرماتے ہیں: میں نبی اکرم صلی اللہ علیہ وسلم کی بارگاہ میں حاضر ہوا، میں نے کہا: اے اللہ کے نبی! میں نے کچھ اشعار کہے ہیں جن میں اللہ تعالیٰ کی حمد و ثناء کی ہے اور آپ کی بھی مدح کی ہے، آپ صلی اللہ علیہ وسلم نے فرمایا: تم نے اللہ تعالیٰ کی حمد کے سلسلے میں جو اشعار لکھے ہیں وہ سناؤ، اور جو میرے بارے میں لکھے ہیں وہ رہنے دو، چنانچہ میں نے اشعار سنانا شروع کئے، ایک طویل القامت قناعت پسند شخص اندر آیا۔ اس کے آتے ہی آپ صلی اللہ علیہ وسلم نے مجھے پڑھنے سے روک دیا، جب وہ چلا گیا تو آپ صلی اللہ علیہ وسلم نے دوبارہ فرمایا: سناؤ، میں نے پھر سنانا شروع کر دئیے، ابھی زیادہ وقت نہیں گزرا تھا کہ وہ آدمی پھر آ گیا اور آپ صلی اللہ علیہ وسلم نے پھر مجھے پڑھنے سے روک دیا، جب وہ چلا گیا تو آپ صلی اللہ علیہ وسلم نے مجھے پھر فرمایا کہ پڑھو، میں نے کہا: یا رسول اللہ صلی اللہ علیہ وسلم یہ شخص کون ہے؟ جب یہ اندر آتا ہے تو آپ مجھے چپ کروا دیتے ہیں اور جب چلا جاتا ہے تو آپ دوبارہ سننا شروع فرما دیتے ہیں۔ آپ صلی اللہ علیہ وسلم نے فرمایا: یہ عمر بن خطاب ہے اور اس میں باطل کی کوئی چیز نہیں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6721]

شباب نے ان کا نسب یوں بیان کیا ہے ” جاریہ بن قدامہ بن زہیر بن حصین بن رباح بن سعد بن یحیی بن ربیعہ بن کعب “۔ ان کی کنیت ” ابوالولید اور ابویزید “ ہے۔ بحاریہ محلے میں بصرہ کے اندر ان کا مکان تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6722]