عروہ بن زبیر سے روایت ہے کہ جب سنہ 9 ہجری میں لوگوں نے حج کا ارادہ کیا تو سیدنا مغیرہ بن شعبہ کے چچا عروہ بن مسعود ثقفی رسول اللہ صلی اللہ علیہ وسلم کی خدمت میں مسلمان ہو کر حاضر ہوئے، انہوں نے رسول اللہ صلی اللہ علیہ وسلم سے اپنی قوم کی طرف واپس جانے کی اجازت مانگی، رسول اللہ صلی اللہ علیہ وسلم نے فرمایا: ”مجھے ڈر ہے کہ وہ تمہیں قتل کر دیں گے“، انہوں نے عرض کی: وہ تو مجھے سوتا ہوا پائیں تو بیدار نہ کریں (یعنی اتنی عزت کرتے ہیں)، چنانچہ رسول اللہ صلی اللہ علیہ وسلم نے انہیں اجازت دے دی، وہ مسلمان ہو کر اپنی قوم کے پاس پہنچے، عشاء کے وقت ثقیف کے لوگ ان کے پاس آئے تو انہوں نے انہیں اسلام کی دعوت دی، لوگوں نے ان پر تہمت لگائی، نافرمانی کی اور انہیں ایسی باتیں سنائیں جن کی انہیں امید نہ تھی، پھر وہ لوگ ان کے پاس سے چلے گئے، یہاں تک کہ جب سحری کا وقت ہوا اور فجر طلوع ہوئی تو عروہ اپنے گھر میں کھڑے ہوئے، انہوں نے نماز کے لیے اذان دی اور شہادتین پکارے، تو ثقیف کے ایک شخص نے انہیں تیر مار کر شہید کر دیا، رسول اللہ صلی اللہ علیہ وسلم نے ارشاد فرمایا: ”عروہ کی مثال صاحبِ یاسین جیسی ہے؛ انہوں نے اپنی قوم کو اللہ تعالیٰ کی طرف بلایا تو انہوں نے انہیں قتل کر دیا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6724]