سیدنا عروہ بن زبیر رضی اللہ عنہ فرماتے ہیں: 9 ہجری میں جب لوگ حج کے لئے آئے تو اس سال سیدنا مغیرہ بن شعبہ رضی اللہ عنہ کے چچا سیدنا عروہ بن مسعود ثقفی رسول اللہ صلی اللہ علیہ وسلم کی بارگاہ میں حاضر ہوئے، پھر انہوں نے اپنی قوم میں واپس جانے کی اجازت مانگی، رسول اللہ صلی اللہ علیہ وسلم نے فرمایا: مجھے خدشہ ہے کہ لوگ تمہیں مار ڈالیں گے، انہوں نے کہا: اگر وہ لوگ مجھے سوتا پائیں گے تو جگا لیں گے۔ رسول اللہ صلی اللہ علیہ وسلم نے ان کو واپس جانے کی اجازت دے دی، چنانچہ وہ مسلمان ہو کر اپنی قوم میں واپس لوٹے، آپ عشاء کے وقت اپنی بستی میں پہنچے، ان کے پاس کچھ لوگ آئے، انہوں نے ان لوگوں کو اسلام کی دعوت پیش کی۔ لیکن ان لوگوں نے ان کو بہت برا بھلا کہا، ان کی بات نہ مانی، اور ان کو وہ وہ باتیں سنائیں، جن کا انہیں وہم و گمان بھی نہ تھا، وہ لوگ واپس چلے گئے، جب سحری کا وقت ہوا، تو سیدنا عروہ نے اپنے گھر کے صحن میں کھڑے ہو کر نماز کے لئے اذان دی، کلمہ شہادت پڑھا، قبیلہ ثقیف کے ایک آدمی نے ان کو تیر مارا جس کی وجہ سے آپ شہید ہو گئے، رسول اللہ صلی اللہ علیہ وسلم نے فرمایا: عروہ کی مثال صاحب یاسین کی سی ہے، انہوں نے بھی اپنی قوم کو اللہ تعالیٰ کی جانب دعوت دی اور لوگوں نے ان کو شہید کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6724]

خلیفہ بن خیاط ان کا نسب بیان کرتے ہوئے فرماتے ہیں ” مجاشع بن مسعود بن ثعلبہ بن وہب بن عائذ “ ان کی کنیت ” ابوسلیمان “ ہے۔ ان کی والدہ اور ان کے بھائی کی والدہ ” ملیکہ بنت سفیان بن حارث بن لبید بن خزیمہ “ ہیں۔ سیدنا مجاشع رضی اللہ عنہ 36 ہجری کو جنگ جمل اصغر میں شہید ہوئے، بنی سدوس کے سامنے بنی سلیم میں اپنی حویلی میں دفن ہوئے۔ بصرہ میں بھی ان کا ایک گھر تھا جو کہ جامع مسجد بصرہ کے سامنے تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6725]