سیدنا مصعب بن عبداللہ زبیری سے روایت ہے، انہوں نے کہا: رسول اللہ صلی اللہ علیہ وسلم کی صاحبزادی سیدہ ام کلثوم رضی اللہ عنہا کا نام آمنہ تھا، رسول اللہ صلی اللہ علیہ وسلم نے سیدہ رقیہ کے بعد ان کا نکاح سیدنا عثمان رضی اللہ عنہ سے ماہ ربیع الاول میں فرمایا، ان کی رخصتی سنہ 8 ہجری کے ماہ جمادی الآخرہ میں ہوئی اور سنہ 9 ہجری کے ماہ شعبان میں عثمان رضی اللہ عنہ کے نکاح ہی میں ان کی وفات ہو گئی، سیدہ ام عطیہ انصاریہ نے انصار کی دیگر خواتین کے ساتھ مل کر انہیں غسل دیا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7030]

یحییٰ بن سعید سے روایت ہے کہ رسول اللہ صلی اللہ علیہ وسلم کی صاحبزادی سیدہ رقیہ رضی اللہ عنہا کی وفات ہو گئی، اور سیدنا عثمان رضی اللہ عنہ نے رسول اللہ صلی اللہ علیہ وسلم کی (دوسری) صاحبزادی سیدہ ام کلثوم رضی اللہ عنہا سے نکاح فرما لیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7031]