سیدنا ابوجمعہ فرماتے ہیں: ایک دفعہ کا ذکر ہے کہ ہم نے رسول اللہ صلی اللہ علیہ وسلم کے ساتھ ناشتہ کیا، ہمارے ساتھ سیدنا ابوعبیدہ بن جراح رضی اللہ عنہ بھی موجود تھے، ہم نے عرض کی: یا رسول اللہ صلی اللہ علیہ وسلم ہم آپ کے ہاتھ پر اسلام لائے، آپ کے ہمراہ غزوات میں شرکت کی، کیا کوئی لوگ ہم سے بھی زیادہ بہتر ہیں؟ آپ صلی اللہ علیہ وسلم نے فرمایا: جی ہاں، تمہارے بعد کچھ لوگ ہوں گے، جو مجھ پر بن دیکھے ایمان لائیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7168]

سیدنا عمر رضی اللہ عنہ فرماتے ہیں: میں نبی اکرم صلی اللہ علیہ وسلم کے پاس بیٹھا ہوا تھا، رسول اللہ صلی اللہ علیہ وسلم نے فرمایا: کیا تم جانتے ہو کہ اہل ایمان میں سب سے افضل ایمان کس کا ہے؟ صحابہ کرام رضی اللہ عنہم نے عرض کیا: یا رسول اللہ صلی اللہ علیہ وسلم ” فرشتے “۔ آپ صلی اللہ علیہ وسلم نے فرمایا: بالکل، بات اسی طرح ہے، یہ ان کا حق ہے، ان کو اس حق سے کیا چیز روکے گی، جبکہ اللہ تعالیٰ نے ان کو یہ مقام خود عطا فرمایا ہے، میری مراد فرشتوں کے علاوہ ہے، صحابہ کرام رضی اللہ عنہم نے کہا: تو پھر انبیاء کرام علیہم السلام ہیں، کہ اللہ تعالیٰ نے ان کو نبوت اور رسالت کے ساتھ سرفراز فرمایا ہے، آپ صلی اللہ علیہ وسلم نے فرمایا: بالکل، بات درست ہے، وہ لوگ اسی منصب کے حقدار ہیں، اور ان کو اس سے کیا چیز روکے گی، جبکہ خود اللہ تبارک و تعالیٰ نے ان کو اس مقام پر پہنچایا ہے، میری مراد ان کے علاوہ ہے۔ راوی کہتے ہیں: ہم نے کہا: یا رسول اللہ صلی اللہ علیہ وسلم پھر وہ کون لوگ ہیں؟ آپ صلی اللہ علیہ وسلم نے فرمایا: کچھ لوگ فی الحال مردوں کی پشتوں میں ہیں، میرے بعد پیدا ہوں گے، وہ مجھے دیکھے بغیر مجھ پر ایمان لائیں گے۔ وہ (قرآن کریم کا) ایک کاغذ لٹکتا ہوا پائیں گے تو اس پر عمل شروع کر دیں گے، ایمان کے لحاظ سے وہ لوگ سب سے افضل ہوں گے۔ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7169]