صحابی رسول سیدنا عبداللہ بن بسر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: خوشخبری ہے ان لوگوں کے لئے جنہوں نے میرا دیدار کیا، اور خوشخبری ہے ان کے لئے جنہوں نے ان کا دیدار کیا جنہوں نے میرا دیدار کیا، اور خوشخبری ہے ان لوگوں کے لئے جنہوں نے ان کو دیکھا جنہوں نے میرا دیدار کرنے والوں کا دیدار کیا اور مجھ پر ایمان لے آیا۔ ٭٭ یہ دیگر اسانید کے ہمراہ بھی منقول ہے جو کہ انس بن مالک رضی اللہ عنہ کی سند کے بالکل قریب تر ہیں اور ہماری وہ اسانید ” عالیہ “ بھی ہیں۔ اور یہ روایات صحت کے لحاظ سے ہماری ذکر کردہ حدیث کے بہت قریب ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7170]

7170 م - خالد بن معدان، ابوامامہ (رضی اللہ عنہ) کے واسطے سے نبی کریم صلی اللہ علیہ وسلم سے اسی طرح کی روایت بیان کرتے ہیں۔ یہ حدیث انس بن مالک (رضی اللہ عنہ) سے بھی قریب تر اسانید کے ساتھ روایت کی گئی ہے جن میں سے کچھ ہم نے عالی اسانید کے ساتھ حاصل کی ہیں، اور ان تمام روایات میں صحت کے اعتبار سے سب سے قریب وہی ہے جس کا ہم نے (پہلے) ذکر کیا ہے۔ (یہاں سے) تمام عرب کے فضائل کا ذکر (شروع ہوتا ہے)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7170M]

سیدنا سلمان رضی اللہ عنہ فرماتے ہیں: رسول اللہ صلی اللہ علیہ وسلم نے مجھے فرمایا: اے سلمان! میرے ساتھ بغض کر کے اپنا دین مت چھوڑ بیٹھنا، میں نے عرض کی: یا رسول اللہ صلی اللہ علیہ وسلم یہ کیسے ہو سکتا ہے کہ میں آپ صلی اللہ علیہ وسلم سے بغض کروں حالانکہ اللہ تعالیٰ نے آپ ہی کی بدولت ہدایت عطا فرمائی ہے۔ حضور صلی اللہ علیہ وسلم نے فرمایا: اہل عرب سے بغض رکھنا، حقیقت میں مجھ سے بغض رکھنے کے مترادف ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7171]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جب اللہ تعالیٰ نے مخلوق کو پیدا کیا، تو ان میں سے عرب کو چنا، پھر عرب میں سے قریش کو چنا، پھر قریش میں سے بنی ہاشم کو چنا، پھر بنی ہاشم سے اللہ تعالیٰ نے مجھے پیدا کیا۔ چنانچہ میں ہر بہترین میں سے بہترین ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7172]