عمرو بن شرید اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: غنی کا قضائے دین سے ٹال مٹول کرنا قرض خواہ کے لئے اس کی عزت اچھالنا اور اس کو قید کروانا جائز کر دیتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7242]

سیدنا عبداللہ بن عمرو رضی اللہ عنہما فرماتے ہیں: رسول اللہ صلی اللہ علیہ وسلم نے رشوت دینے والے پر اور لینے والے پر لعنت فرمائی۔ سیدنا ابوہریرہ رضی اللہ عنہ کی حدیث درج ذیل ہے۔ [المستدرك على الصحيحين/كِتَابُ الْأَحْكَامِ/حدیث: 7243]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے (فیصلہ کروانے کے لئے) رشوت دینے والے اور لینے والے پر لعنت فرمائی۔ سیدنا ثوبان رضی اللہ عنہ کی حدیث [المستدرك على الصحيحين/كِتَابُ الْأَحْكَامِ/حدیث: 7244]

سیدنا ثوبان رضی اللہ عنہ سے مروی ہے کہ نبی اکرم صلی اللہ علیہ وسلم نے فرمایا: اللہ تعالیٰ نے رشوت دینے والے اور رشوت لینے والے اور ان دونوں کے درمیان رشوت کا معاملہ طے کروانے والے پر لعنت فرمائی۔ ٭٭ میں نے عمر بن ابی سلمہ اور لیث بن ابی سلیم کی روایات کو شواہد میں ذکر کیا ہے، اصول میں نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7245]

سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ارشاد فرمایا: جس کو دس آدمیوں کا ذمہ دار بنایا گیا، اس نے ان کے درمیان ایسا فیصلہ کیا جو ان کو پسند تھا، یا ان کو ناپسند تھا، اس کو قیامت کے دن اس حال میں لایا جائے گا کہ اس کے ہاتھ اس کی گدی پر بندھے ہوں گے۔ اگر اس نے اللہ تعالیٰ کے احکام کے مطابق فیصلہ کیا ہو گا، اور رشوت نہ لی ہو گی، اور کسی قسم کا کوئی ظلم نہ کرے، قیامت کے دن اللہ تعالیٰ اس کو قید سے آزاد رکھے گا جس دن اس کے طوق کے سوا کسی کا طوق نہیں ہو گا۔ اور اگر اللہ تعالیٰ کے احکام کے خلاف فیصلہ کیا ہو گا اور فیصلے میں رشوت لی ہو گی، کسی کی طرف داری کی ہو گی۔ اس کا بایاں ہاتھ اس کے دائیں ہاتھ کے ساتھ باندھا ہو گا اور اس کو دوزخ میں پھینک دیا جائے گا۔ پانچ سو سال تک وہ جہنم میں نیچے کی طرف گرتا رہے گا لیکن اتنے عرصے میں بھی وہ اس کی تہہ تک نہیں پہنچ پائے گا۔ ٭٭ سعدان بن ولید بجلی، کوفی ہیں، ان کی مرویات بہت کم ہیں، اس حدیث کو امام بخاری رحمۃ اللہ علیہ اور امام مسلم رحمۃ اللہ علیہ نے نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7246]