سیدنا انس بن مالک رضی اللہ عنہ سے روایت ہے کہ بقیع میں ایک خرگوش بھاگا تو میں بھی ان لوگوں میں شامل تھا جو اسے پکڑنے کے لیے پیچھے دوڑے، میں سب سے آگے نکل گیا اور اسے پکڑ لیا، پھر میں اسے سیدنا ابو طلحہ رضی اللہ عنہ کے پاس لایا تو انہوں نے اسے ذبح کر کے بھوننے کا حکم دیا، پھر انہوں نے خرگوش کا پچھلا حصہ (ران) مجھے دے کر نبی کریم صلی اللہ علیہ وسلم کی طرف بھیجا، آپ صلی اللہ علیہ وسلم نے دریافت فرمایا: ”یہ کیا ہے؟“ میں نے عرض کی: یہ خرگوش کی ران ہے جو ابو طلحہ نے آپ کے لیے بھیجی ہے، تو آپ صلی اللہ علیہ وسلم نے اسے قبول فرما لیا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7277]

سیدنا ابو رافع رضی اللہ عنہ سے روایت ہے کہ میں رسول اللہ صلی اللہ علیہ وسلم کے لیے بکری کا پیٹ (یا اوجھڑی کا گوشت) بھونا کرتا تھا، آپ صلی اللہ علیہ وسلم اس میں سے تناول فرماتے اور پھر (دوبارہ وضو کیے بغیر) نماز کے لیے تشریف لے جاتے۔ [المستدرك على الصحيحين/كِتَابُ الْأَطْعِمَةِ/حدیث: 7278]

سیدنا ابو رافع رضی اللہ عنہ سے روایت ہے کہ میں رسول اللہ صلی اللہ علیہ وسلم کے لیے بکری کے پیٹ (کا گوشت) بھونا کرتا تھا جبکہ آپ صلی اللہ علیہ وسلم نے نماز کے لیے وضو فرما رکھا ہوتا تھا، آپ صلی اللہ علیہ وسلم اسے تناول فرماتے اور پھر (دوبارہ وضو کیے بغیر) نماز کے لیے تشریف لے جاتے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7279]

سیدنا صفوان بن امیہ رضی اللہ عنہ سے روایت ہے کہ رسول اللہ صلی اللہ علیہ وسلم نے مجھے اس حال میں دیکھا کہ میں گوشت کو ہڈی سے اپنے ہاتھ کے ذریعے (نوچ کر) علیحدہ کر رہا تھا، تو آپ صلی اللہ علیہ وسلم نے مجھ سے فرمایا: ”اے صفوان!“ میں نے عرض کی: میں حاضر ہوں، آپ صلی اللہ علیہ وسلم نے فرمایا: ”گوشت کو اپنے منہ کے قریب لے جاؤ (اور دانتوں سے کاٹ کر کھاؤ)، کیونکہ یہ زیادہ لذیذ، خوشگوار اور جلد ہضم ہونے والا طریقہ ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7280]