محمد بن عبداللہ بن مسلم بیان کرتے ہیں کہ ابومسلم خولانی حج پر گئے اور ام المومنین سیدہ عائشہ رضی اللہ عنہا کی خدمت میں حاضر ہوئے، ام المومنین ان سے شام کے حالات اور وہاں کے موسم کے بارے میں پوچھنے لگ گئیں، اور وہ ام المومنین کو وہاں کے حالات بتاتے رہے، ام المومنین نے کہا: وہ لوگ وہاں کی سردی کیسے برداشت کرتے ہیں؟ ابومسلم خولانی نے کہا: اے ام المومنین! وہ لوگ طلاء نامی شراب پیتے ہیں۔ ام المومنین نے فرمایا: اللہ تعالیٰ نے سچ فرمایا: میرے محبوب نے ہم تک پہنچایا، حضور صلی اللہ علیہ وسلم نے فرمایا: میری امت کے کچھ لوگ ایسے ہوں گے جو شراب کا نام بدل کر اسے پیئں گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ الْأَشْرِبَةِ/حدیث: 7423]

مریم بنت طارق فرماتی ہیں: میں ہجرت کرنے والی خواتین کے ہمراہ حج کرنے گئی، ہم ام المومنین سیدہ عائشہ رضی اللہ عنہا کی خدمت میں حاضر ہوئیں، عورتیں ان سے برتنوں وغیرہ کے بارے میں پوچھنے لگ گئیں، ام المومنین نے فرمایا: اے خواتین! تم ایسے برتنوں کا ذکر کر رہی ہو، جن میں سے اکثر ایسے ہیں جو رسول اللہ صلی اللہ علیہ وسلم کے زمانے میں نہیں تھے۔ تم اللہ تعالیٰ سے ڈرتی رہو اور نشہ آور چیز سے بچو، کیونکہ رسول اللہ صلی اللہ علیہ وسلم نے ارشاد فرمایا ہے ” ہر نشہ آور چیز حرام ہے، اگر تمہیں تمہارے مٹکے کا پانی نشہ دے تو اس سے بھی بچو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَشْرِبَةِ/حدیث: 7424]