سیدنا ابو ادریس عائذ اللہ رحمہ اللہ سے روایت ہے کہ ایک شخص گزرے تو میں ان کے پاس گیا اور کہا: بے شک انہوں (سیدنا معاذ رضی اللہ عنہ) نے مجھے رسول اللہ صلی اللہ علیہ وسلم کی ایک حدیث سنائی ہے، کیا آپ نے بھی وہ سنی ہے؟ انہوں نے کہا: وہ تمہیں حق کے سوا کچھ نہیں بتائیں گے، پھر میں نے انہیں وہ حدیث سنائی تو انہوں نے کہا: میں نے خود یہ رسول اللہ صلی اللہ علیہ وسلم سے سنی ہے یعنی: ”اللہ کی خاطر آپس میں محبت کرنے والوں کو اللہ اپنے عرش کے سائے میں جگہ دے گا جس دن اس کے سائے کے سوا کوئی سایہ نہ ہوگا“، اور اس سے بھی افضل بات سنی ہے، میں نے پوچھا: اللہ آپ پر رحم کرے، اس سے افضل کیا ہے؟ انہوں نے کہا: میں نے رسول اللہ صلی اللہ علیہ وسلم کو اللہ عزوجل کا یہ فرمان بیان کرتے ہوئے سنا: ”میری محبت ان لوگوں کے لیے ثابت (لازم) ہو گئی جو میری خاطر آپس میں محبت کرتے ہیں، میری محبت ان کے لیے ثابت ہو گئی جو میری خاطر باہم تعلق رکھتے ہیں، میری محبت ان کے لیے ثابت ہو گئی جو میری خاطر ایک دوسرے کی زیارت (ملاقات) کو جاتے ہیں اور میری محبت ان کے لیے ثابت ہو گئی جو میری خاطر ایک دوسرے پر مال خرچ کرتے ہیں“، راوی کہتے ہیں کہ مجھے یاد نہیں کہ انہوں نے پہلے کس بات کا ذکر کیا، میں نے پوچھا: اللہ آپ پر رحم کرے، آپ کون ہیں؟ انہوں نے کہا: «أنا عُبادة بن الصامت» ”میں عبادہ بن صامت ہوں“۔
یہ اسناد شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الْبِرِّ وَالصِّلَةِ/حدیث: 7503]