سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب تم میں سے کسی کو بخار ہو جائے تو اسے چاہیے کہ سحری کے وقت تین راتوں تک (اپنے جسم پر) ٹھنڈا پانی چھڑکے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا، البتہ ان دونوں کا ان اسانید پر اتفاق ہے جن میں یہ مذکور ہے کہ ”بخار جہنم کی تپش کا حصہ ہے، پس اسے پانی سے ٹھنڈا کرو۔“ [المستدرك على الصحيحين/كِتَابُ الطِّبِّ/حدیث: 7626]

ابو جمرہ ضبعی سے روایت ہے، انہوں نے کہا: میں مکہ مکرمہ میں سیدنا ابن عباس رضی اللہ عنہما کی مجلس میں بیٹھا کرتا تھا، پھر چند دن میں غائب رہا، جب میں دوبارہ حاضر ہوا تو انہوں نے پوچھا: تمہیں کس چیز نے روک دیا تھا؟ میں نے عرض کیا: مجھے بخار ہو گیا تھا، انہوں نے فرمایا: اسے زمزم کے پانی سے ٹھنڈا کرو کیونکہ رسول اللہ صلی اللہ علیہ وسلم نے فرمایا ہے: ”بخار جہنم کی تپش میں سے ہے، پس اسے زمزم کے پانی سے ٹھنڈا کرو۔“
یہ حدیث شیخین کی شرط پر صحیح ہے لیکن انہوں نے اس سیاق کے ساتھ اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 7627]