سیدنا عمر بن خطاب رضی اللہ عنہ سیدہ اسماء بنت عمیس رضی اللہ عنہا سے روایت کرتے ہیں کہ رسول اللہ صلی اللہ علیہ وسلم ایک دن ان کے پاس تشریف لائے جبکہ وہ «شُبْرُمٌ» ”شبرم“ (ایک دست آور بوٹی) کو کوٹ رہی تھیں، آپ صلی اللہ علیہ وسلم نے پوچھا: ”تم اس کا کیا کرتی ہو؟“ انہوں نے عرض کیا: ہم اسے فلاں شخص کو پلاتے ہیں (تاکہ اس کا پیٹ صاف ہو جائے)، آپ صلی اللہ علیہ وسلم نے فرمایا: ”یہ تو بیماری (یعنی نہایت سخت اور نقصان دہ) ہے۔“ (راوی کہتے ہیں کہ) پھر آپ صلی اللہ علیہ وسلم دوبارہ تشریف لائے تو ان کے پاس «سَنَا» ”سنا“ (سنا مکی) تھی، آپ صلی اللہ علیہ وسلم نے پوچھا: ”تم اس کا کیا کرتی ہو؟“ انہوں نے عرض کیا: اسے فلاں شخص پیتا ہے، آپ صلی اللہ علیہ وسلم نے فرمایا: ”اگر کوئی چیز ایسی ہوتی جو موت کو روک سکتی یا موت کے مقابلے میں نفع دے سکتی تو وہ سنا ہوتی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 7628]

سیدہ اسماء بنت عمیس رضی اللہ عنہا سے روایت ہے کہ رسول اللہ صلی اللہ علیہ وسلم نے ان سے دریافت فرمایا: ”تم پیٹ صاف کرنے (جلاب) کے لیے کیا استعمال کرتی ہو؟“ انہوں نے عرض کیا: میں ”شبرم“ استعمال کرتی تھی، آپ صلی اللہ علیہ وسلم نے فرمایا: ”وہ تو بہت گرم اور شدید (جلانے والی) ہے،“ انہوں نے کہا: پھر میں نے ”سنا“ استعمال کی تو رسول اللہ صلی اللہ علیہ وسلم نے فرمایا: ”اگر کوئی ایسی چیز ہوتی جس میں موت سے شفا ہوتی تو وہ سنا ہوتی۔“ [المستدرك على الصحيحين/كِتَابُ الطِّبِّ/حدیث: 7629]