سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”بہترین چیزیں جن سے تم علاج کرتے ہو وہ یہ ہیں: ناک میں دوا ڈالنا «السَّعُوط»، منہ کی ایک جانب سے دوا پلانا «اللَّدُود»، سینگی لگوانا «الحِجَامة» اور جلاب لینا ( «المَشِيُّ» ۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 7662]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”شبِ معراج میرا گزر فرشتوں کی جس جماعت پر بھی ہوا، انہوں نے یہی کہا کہ اے محمد صلی اللہ علیہ وسلم ! آپ حجامہ (سینگی لگوانا) لازم پکڑیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 7663]

سیدنا جابر رضی اللہ عنہ سے روایت ہے کہ سیدہ ام سلمہ رضی اللہ عنہا نے رسول اللہ صلی اللہ علیہ وسلم سے حجامہ کروانے کی اجازت مانگی، تو نبی کریم صلی اللہ علیہ وسلم نے ابو طیبہ کو حکم دیا کہ وہ انہیں سینگی لگائیں، راوی کہتے ہیں کہ میرا خیال ہے انہوں نے یہ بھی کہا کہ وہ (ابو طیبہ) ان کے رضاعی بھائی تھے یا ایک ایسے لڑکے تھے جو ابھی بالغ نہیں ہوئے تھے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الطِّبِّ/حدیث: 7664]