سیدنا ابوسعید خدری رضی اللہ عنہ سے روایت ہے کہ نبی کریم صلی اللہ علیہ وسلم صلی اللہ علیہ وسلم نے ارشاد فرمایا: ”بے شک اللہ تعالیٰ اپنے مومن بندے سے محبت کرنے کے باوجود اسے دنیا (کی آسائشوں) سے اس طرح بچاتا ہے جیسے تم اپنے مریض کو کھانے اور پینے سے (پرہیز کروا کر) بچاتے ہو کیونکہ تمہیں اس کی صحت کا خوف ہوتا ہے۔“ امام حاکم رحمہ اللہ فرماتے ہیں: اسی طرح (راوی نے) یہ حدیث سیدنا ابوسعید خدری رضی اللہ عنہ سے روایت کی ہے، اور عمارہ بن غزیہ کی حدیث میں یہ سیدنا قتادہ بن نعمان رضی اللہ عنہ سے مروی ہے ؛ اور میرے نزدیک یہ دونوں اسناد صحیح ہیں، واللہ اعلم۔ [المستدرك على الصحيحين/كِتَابُ الطِّبِّ/حدیث: 7654]

عاصم بن عمر بن قتادہ بیان کرتے ہیں کہ سیدنا جابر بن عبداللہ رضی اللہ عنہ نے سیدنا مقنع (بن سنان تابعی) کی عیادت کی پھر فرمایا: میں اس وقت تک یہاں سے نہیں جاؤں گا جب تک تو پچھنے نہیں لگوائے گا۔ کیونکہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ اس میں شفاء ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیھما نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7655]

سیدنا سمرہ رضی اللہ عنہ فرماتے ہیں کہ بنی ام قرفہ میں سے بنی فزارہ کا ایک دیہاتی شخص رسول اللہ صلی اللہ علیہ وسلم کی بارگاہ میں آیا، ایک حجام حضور صلی اللہ علیہ وسلم کے سر میں پچھنے لگا رہا تھا۔ وہ چھری کے ساتھ آپ صلی اللہ علیہ وسلم کے سر میں نشتر لگا رہا تھا۔ اس نے پوچھا: یا رسول اللہ صلی اللہ علیہ وسلم آپ یہ کس قسم کا علاج کروا رہے ہیں؟ یا رسول اللہ صلی اللہ علیہ وسلم آپ نے اس کو یہ اجازت کیوں دے رکھی ہے کہ یہ آپ کی جلد کاٹ رہا ہے، حضور صلی اللہ علیہ وسلم نے فرمایا: یہ حجامت ہے، اور تمہارے علاجوں میں، یہ طریقہ علاج سب سے بہتر ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیھما نے اس کو نقل نہیں کیا۔ اس حدیث شعبہ بن حجاج عتکی اور زہیر بن معاویہ جعفی نے عبدالملک بن عمیر سے روایت کیا ہے۔ شعبہ کی روایت کردہ حدیث درج ذیل ہے۔ [المستدرك على الصحيحين/كِتَابُ الطِّبِّ/حدیث: 7656]

سیدنا سمرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بہترین طریقہ علاج حجامت (پچھنے لگوانا) ہے۔ زہیر سے روایت کردہ حدیث درج ذیل ہے۔ [المستدرك على الصحيحين/كِتَابُ الطِّبِّ/حدیث: 7657]

زہیر نے عبدالملک بن عمیر کے واسطے سے حصین بن حر کے حوالے سے سمرہ سے نبی اکرم صلی اللہ علیہ وسلم کا اسی جیسا فرمان نقل کیا ہے۔ [المستدرك على الصحيحين/كِتَابُ الطِّبِّ/حدیث: 7658]

سیدنا سمرہ رضی اللہ عنہ فرماتے ہیں: بنی ام قرفہ میں سے بنی فزارہ کا ایک دیہاتی شخص رسول اللہ صلی اللہ علیہ وسلم کے پاس آیا، تو ایک حجام اپنے اوزار کے ساتھ حضور صلی اللہ علیہ وسلم کو پچھنے لگا رہا تھا وہ آپ صلی اللہ علیہ وسلم کے سر میں چھری کے ساتھ نشتر لگا رہا تھا۔ اس نے پوچھا: یا رسول اللہ صلی اللہ علیہ وسلم یہ کیا ہے؟ آپ نے اس کو یہ اجازت کیوں دے رکھی ہے؟ یہ آپ کی جلد کو کاٹ رہا ہے۔ حضور صلی اللہ علیہ وسلم نے فرمایا: یہ حجامت ہے۔ اس نے کہا: یا رسول اللہ صلی اللہ علیہ وسلم حجامت کیا ہے؟ آپ صلی اللہ علیہ وسلم نے فرمایا: لوگ جو علاج کرواتے ہیں، ان میں سب سے اچھا طریقہ علاج حجامت (پچھنے لگوانا) ہے۔ [المستدرك على الصحيحين/كِتَابُ الطِّبِّ/حدیث: 7659]

ابوالحکم بجلی عبدالرحمن بن ابی نعم فرماتے ہیں: میں سیدنا ابوہریرہ رضی اللہ عنہ کے پاس گیا، سیدنا ابوہریرہ رضی اللہ عنہ حجامت کروا رہے تھے، انہوں نے مجھے کہا: اے ابوالحکم! پچھنے لگواؤ گے؟ میں نے کہا: میں نے تو کبھی بھی پچھنے نہیں لگوائے۔ انہوں نے کہا: ابوالقاسم محمد صلی اللہ علیہ وسلم نے مجھے بتایا کہ سیدنا جبریل امین علیہ السلام نے ان کو بتایا ہے کہ لوگ جو علاج کراتے ہیں ان میں سب سے اچھا طریقہ علاج ” حجامت “ (پچھنے لگوانا) ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیھما نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7660]