ام المومنین سیدہ ام سلمہ رضی اللہ عنہما فرماتی ہیں کہ نبی اکرم صلی اللہ علیہ وسلم نے میرے حجرے میں ایک بچی دیکھی، اس کے چہرے پر چھائیاں تھیں۔ آپ صلی اللہ علیہ وسلم نے فرمایا: اس کو دم کرواؤ، کیونکہ اس کو نظر لگی ہوئی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7676]

سیدنا عبداللہ بن عباس رضی اللہ عنہما سے مروی ہے کہ نبی اکرم صلی اللہ علیہ وسلم جب کسی مریض کی عیادت کے لیے تشریف لے جاتے تو اس کے سر کے قریب بیٹھ جاتے تو سات مرتبہ یہ دم کرتے۔ أَسْأَلُ اللَّهَ الْعَظِيمَ رَبَّ الْعَرْشِ الْعَظِيمِ أَنْ يَشْفِيَكَ ” میں عرش عظیم کے رب، اللہ رب العزت کی بارگاہ میں دعا مانگتا ہوں کہ وہ تجھے شفاء عطا فرمائے “ اگر اس کی موت کا وقت نہ آیا ہوتا تو اس کو اس تکلیف سے فوراً آرام آ جاتا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ سعید اور ابن عباس سے روایت کرنے میں کسی نے بھی عمرو بن حارث کی پیروی نہیں کی۔ تاہم اس حدیث کو حجاج بن ارطاۃ نے منہال کے ذریعے عبداللہ بن الحارث سے اس کو روایت کیا ہے اور انہوں نے ان دونوں کے درمیان سعید بن جبیر کا نام نہیں لیا۔ [المستدرك على الصحيحين/كِتَابُ الطِّبِّ/حدیث: 7677]

سیدنا عبداللہ بن عباس رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: جس نے کسی مریض کی عیادت کی اور اس کے پاس سات مرتبہ یہ دعا مانگی أَسْأَلُ اللَّهَ الْعَظِيمَ رَبَّ الْعَرْشِ الْعَظِيمِ أَنْ يَشْفِيَكَ سَبْعًا اگر اس کی موت نہ آئی ہوئی ہو گی تو اس کی شفاء مل جائے گی۔ ٭٭ اس حدیث کو ابوخالد الدالانی اور میسرہ بن حبیب النہدی نے منہال بن عمرو کے ذریعے سعید بن جبیر کے واسطے سے سیدنا عبداللہ بن عباس رضی اللہ عنہما سے روایت کیا ہے۔ سیدنا خالد کی روایت کردہ حدیث درج ذیل ہے [المستدرك على الصحيحين/كِتَابُ الطِّبِّ/حدیث: 7678]

سیدنا عبداللہ بن عباس رضی اللہ عنہما فرماتے ہیں کہ نبی اکرم صلی اللہ علیہ وسلم نے فرمایا: کوئی مسلمان جب کسی مریض کی عیادت کے لیے جائے، تو وہ اس کے پاس بیٹھ کر سات مرتبہ یہ دعا پڑھ دے۔ أَسْأَلُ اللَّهَ الْعَظِيمَ رَبَّ الْعَرْشِ الْعَظِيمِ أَنْ يَشْفِيَكَ، سَبْعًا اگر اس کی موت نہ آئی ہوئی ہو گی تو اس کو شفاء مل جائے گی۔ میسرہ بن حبیب کی روایت کردہ حدیث درج ذیل ہے۔ [المستدرك على الصحيحين/كِتَابُ الطِّبِّ/حدیث: 7679]