سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص مریض کے پاس عیادت کے لیے جائے، اس کے پاس بیٹھ کر یہ دعا مانگے۔ اَسْاَلُ اللہُ العَظِیْمَ رَبِّ الْعَرْشَ الْعَظِیْمِ اَنْ یَشْفِیْكَ سَبْعاً اگر موت نہ آئی ہوئی تو اللہ تعالیٰ کے فضل سے اس کو شفاء مل جائے گی۔ [المستدرك على الصحيحين/كِتَابُ الطِّبِّ/حدیث: 7680]

سیدنا عمران بن حصین رضی اللہ عنہ فرماتے ہیں کہ رسول اللہ صلی اللہ علیہ وسلم نے ” آگ سے داغ لگوانے “ سے منع فرمایا۔ ہم نے پھر بھی آگ سے داغ لگوا کر علاج کروایا تو ہم نے نہ فلاح پائی، نہ ہم کامیاب ہوئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7681]

سیدنا عبداللہ رضی اللہ عنہ فرماتے ہیں: ایک انصاری شخص کو بہت سخت مرض لاحق ہوئی، اس کے لیے کسی نے ” کی (آگ سے داغ لگوانے کا علاج) “ تجویز کیا، وہ لوگ رسول اللہ صلی اللہ علیہ وسلم کی بارگاہ میں آ گئے، رسول اللہ صلی اللہ علیہ وسلم نے ان سے منہ پھیر لیا، وہ لوگ دوبارہ آئے، آپ صلی اللہ علیہ وسلم نے پھر منہ پھیر لیا، جب وہ لوگ تیسری یا شاید چوتھی مرتبہ آئے تو آپ صلی اللہ علیہ وسلم نے فرمایا: اگر تم چاہو تو اس کو چھوڑ دو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7682]