سیدنا علی بن ابی طالب رضی اللہ عنہ فرماتے ہیں کہ رسول اللہ صلی اللہ علیہ وسلم نے مقابلہ (جس کا کان اگلی جانب سے کٹا ہوا ہو) مدابرہ (جس کا کان پچھلی جانب سے کٹا ہوا ہوا) شرقاء (جس کے کان پھٹے ہوئے ہوں) خرقاء (جس کے کانوں میں سوراخ ہے) جدعاء (جس کا کان، ناک یا ہونٹ کٹے ہوئے ہوں) جانور کی قربانی کرنے سے منع کیا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَضَاحِيِّ/حدیث: 7721]

سیدنا علی بن ابی طالب رضی اللہ عنہ فرماتے ہیں: رسول اللہ صلی اللہ علیہ وسلم نے ہمیں حکم دیا ہے کہ آنکھ اور کان کا اچھی طرح مشاہدہ کر لیں۔ اور ہم مقابلہ، مدابرہ، شرقاء، اور خرقاء جانور کی قربانی نہ کریں۔ ابواسحاق کہتے ہیں: مقابلہ ایسے جانور کو کہتے ہیں، جس کا کان کٹا ہوا ہوا۔ مدابرہ اس کو کہتے ہیں جس کے کان کا ایک حصہ کٹا ہوا ہو۔ شرقاء، اس جانور کو کہتے ہیں جس کے کان پھٹے ہوئے ہوں۔ اور خرقاء اس جانور کو کہتے ہیں جس کے کان میں سوراخ ہو۔ ٭٭ اس حدیث کی تمام اسانید صحیح ہیں لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ میرا خیال ہے کہ اس میں قیس بن الربیع کے واسطے سے ابواسحاق سے روایت موجود ہے اور شیخین رحمۃ اللہ علیہما نے قیس کی روایات نقل نہیں کیں [المستدرك على الصحيحين/كِتَابُ الْأَضَاحِيِّ/حدیث: 7722]