سیدنا عبداللہ بن عمرو رضی اللہ عنہما فرماتے ہیں: ایک آدمی رسول اللہ صلی اللہ علیہ وسلم کی بارگاہ میں آیا، رسول اللہ صلی اللہ علیہ وسلم نے اس کو فرمایا: مجھے حکم دیا گیا ہے کہ میں قربانی کے دن کو عید بناؤں، اللہ تعالیٰ نے یہ دن اس امت کے لیے عید بنا دیا ہے۔ اس آدمی نے کہا: اگر میرے پاس منیحہ (ایسی اونٹنی جو کسی سے فائدہ اٹھانے کے لیے لی گئی ہو) یا گھر والوں کی بکری یا گھر والوں کی منیحہ کے علاوہ میرے پاس کوئی جانور نہ ہو، تو کیا میں اس کو ذبح کر لوں؟ آپ صلی اللہ علیہ وسلم نے فرمایا: نہیں۔ لیکن (قربانی کے دن) اپنے ناخن کاٹ لے، اپنی مونچھیں پست کروا لے، اور بال کاٹ لے، تجھے اللہ تعالیٰ کی بارگاہ سے اسی عمل کی بدولت قربانی کا ثواب مل جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَضَاحِيِّ/حدیث: 7719]

سیدنا علی بن ابی طالب رضی اللہ عنہ فرماتے ہیں کہ نبی اکرم صلی اللہ علیہ وسلم نے ایسا جانور قربان کرنے سے منع فرمایا ہے جس کے کان یا سینگ کٹے ہوئے ہوں۔ قتادہ کہتے ہیں: میں نے یہ بات سیدنا سعید بن مسیب رضی اللہ عنہ کو بتائی تو انہوں نے بتایا کہ اعضب، اس جانور کو کہتے ہیں جس کا آدھا یا اس سے زیادہ سینگ کٹا ہوا ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَضَاحِيِّ/حدیث: 7720]