سیدنا عمرو بن العاص رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کے دن ہر انسان کے ذمہ گناہ ہوں گے، سوائے سیدنا یحیی بن زکریا علیہ السلام کے۔ راوی کہتے ہیں: پھر حضور صلی اللہ علیہ وسلم نے اپنا ہاتھ زمین کی جانب بڑھایا اور ایک چھوٹی سی لکڑی پکڑی پھر فرمایا: اس کی وجہ یہ ہے کہ ان کے ساتھ مردوں والی چیز صرف اس لکڑی جتنی تھی، اسی لیے اللہ تعالیٰ نے ان کے بارے میں کہا ہے کہ وہ ” سَیِّدَا وحَصُوْرًا وَ نَبِیّاً مِنَ الصَّالِحِینَ ” اور سردار، اور ہمیشہ کے لیے عورتوں سے بچنے والا اور نبی ہمارے خاصوں میں سے “۔ ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7810]

سیدنا علی بن ابی طالب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس طرح جاہلیت کے لوگ جذباتی ہو جایا کرتے تھے، اس طرح دو مرتبہ میرے ساتھ ہوا۔ لیکن ہر مرتبہ اللہ تعالیٰ نے مجھے بچا لیا۔ 1۔ ایک ایک قریشی نوجوان مکہ کے بالائی علاقے میں بکریاں چرا رہا تھا، میں نے اس سے کہا: آج رات تو میری بکریوں کا خیال کرنا، میں مکہ میں لڑکوں کے ساتھ گپ شپ کرنے جا رہا ہوں، اس نے کہا: ٹھیک ہے۔ میں بکریاں اس سپرد کر کے وہاں سے نکل آیا، جب میں مکہ کی آبادی کے قریب پہنچا تو مجھے گانے باجے اور دف اور مزامیر کی آوازیں سنائی دیں، میں نے کسی سے پوچھا کہ یہ آوازیں کیسی ہیں؟ اس نے بتایا کہ یہ شادی ہو رہی ہے۔ یہ آواز سنتے ہی مجھ پر نیند کا غلبہ ہو گیا اور میں سو گیا۔ ساری رات وہیں سویا رہا، دن کے وقت دھوپ کی گرمی پڑی تو میری آنکھ کھلی، میں وہیں سے اٹھ کر اپنے اس ساتھی کے پاس واپس چلا گیا۔ 2۔ دوسری مرتبہ پھر ایسا ہی ہوا، لیکن اس بار بھی مجھے نیند آ گئی اور میں سو گیا اور صبح کے وقت میری آنکھ کھلی، میں اپنے ساتھی کے پاس لوٹ گیا۔ اس نے مجھ سے پوچھا: کہ رات تم نے کیا کیا؟ میں نے کہا: میں نے کچھ بھی نہیں کیا۔ رسول اللہ صلی اللہ علیہ وسلم فرماتے ہیں: اس کے بعد میں نے کبھی بھی اہل جاہلیت کی رسومات میں سے کسی کا ارادہ بھی نہیں کیا۔ حتیٰ کہ اللہ تعالیٰ نے مجھے نبوت کی عزت عطا فرما دی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7811]

سیدنا عبداللہ بن عباس رضی اللہ عنہما فرماتے ہیں کہ الَّذِينَ يَجْتَنِبُونَ كَبَائِرَ الْإِثْمِ وَالْفَوَاحِشَ إِلَّا اللِّمَمَ ” وہ جو بڑے گناہوں اور بے حیائیوں سے بچتے ہیں مگر اتنا کہ گناہ کے پاس گئے اور رک گئے “ () اس کا مطلب یہ ہے کہ کوئی آدمی گناہ میں مبتلا ہوا، لیکن پھر اس سے توبہ کر لی۔ کسی شاعر نے کہا ہے۔ اے اللہ! اگر تو بخشنے پہ آئے بڑے جم غفیر کو بخش دے، تیرا وہ کون سا بندہ ہے جو گناہ میں مبتلا نہیں ہوا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7812]