سیدنا ابن ابی ملیکہ رضی اللہ عنہ اللہ تعالیٰ کے ارشاد وَلَقَدْ هَمَّتْ بِهِ وَهَمَّ بِهَا [ يوسف: 24 ] کے بارے میں فرماتے ہیں: سیدنا یوسف علیہ السلام زلیخا کے ساتھ وطی کے لیے تیار ہو چکے تھے کہ اچانک ایک آواز آئی ” اے ابن یعقوب! کیا تم زنا کرو گے؟ وہ ایسے پرندے کی طرح ہو گئے جس کے پر اکھیڑ دئیے گئے ہوں اور وہ بغیر پروں کے اڑنے کی کوشش کر رہا ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7844]

سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم اپنے صحابہ کرام رضی اللہ عنہم کو وعظ و نصیحت فرما رہے تھے کہ وہاں سے تین آدمیوں کا گزر ہوا، ان میں سے ایک آدمی آیا اور نبی اکرم صلی اللہ علیہ وسلم کے پاس بیٹھ گیا، دوسرا تھوڑا سا آگے گیا اور بیٹھ گیا اور تیسرا چلا گیا۔ نبی اکرم صلی اللہ علیہ وسلم نے فرمایا: یہ شخص ہمارے پاس آ کر بیٹھ گیا ہے، اس نے توبہ کر لی اور اللہ تعالیٰ نے اس کی توبہ کو قبول فرما لیا ہے، اور جو آدمی تھوڑا آگے گیا پھر بیٹھا، اس نے اللہ تعالیٰ سے حیاء کیا، اللہ تعالیٰ نے اس سے حیاء کیا۔ اور وہ جو سیدھا چلا گیا، وہ اللہ تعالیٰ سے بے نیاز ہوا، اللہ تعالیٰ اس سے بے نیاز ہو گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7845]