ام المومنین سیدہ عائشہ رضی اللہ عنہا کے بارے میں مروی ہے کہ انہوں نے عرض کی: یا رسول اللہ صلی اللہ علیہ وسلم آپ میری کنیت کیوں نہیں رکھتے؟ آپ صلی اللہ علیہ وسلم نے فرمایا: تم اپنے بیٹے عبداللہ بن زبیر کے نام سے کنیت رکھ لو، چنانچہ ام المومنین سیدہ عائشہ رضی اللہ عنہا نے اپنی کنیت ” ام عبداللہ “ رکھوائی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7931]

سیدنا عمر بن خطاب رضی اللہ عنہ کے بارے میں مروی ہے کہ انہوں نے سیدنا صہیب رومی سے فرمایا: اگر تمہارے اندر تین عادتیں نہ ہوں تو تم بہت اچھے آدمی ہو، سیدنا صہیب نے پوچھا: وہ کون سی عادتیں ہیں؟ سیدنا عمر رضی اللہ عنہ نے فرمایا: ٭ تم نے کنیت رکھی ہوئی ہے جبکہ تیری تو کوئی اولاد نہیں ہے۔ ٭ تم اپنے آپ کو عربی کہلاتے ہو جبکہ تم روم کے باشندے ہو۔ ٭ اور تم کھانے میں اسراف کرتے ہو۔ سیدنا صہیب نے کہا: اے امیرالمومنین! آپ نے فرمایا ہے کہ میں نے کنیت رکھی ہوئی ہے اور میری کوئی اولاد نہیں ہے اس کا جواب یہ ہے کہ میری کنیت ” ابویحیی “ خود رسول اللہ صلی اللہ علیہ وسلم نے رکھی تھی۔ آپ نے فرمایا کہ میں رومی ہوں اور عربی کیوں کہلاتا ہوں۔ اس کا جواب یہ ہے کہ میرا تعلق نمر بن قاسط سے ہے، موصل سے مجھے قید کر لیا گیا تھا، اس وقت میں بچہ تھا، لیکن میں اپنے خاندان اور نسب کو پہچانتا ہوں۔ آپ نے فرمایا کہ میں طعام میں اسراف کرتا ہوں۔ اس کا جواب یہ ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تم میں سے بہترین شخص وہ ہے جو کھانا کھلائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7932]

عبدالعزیز بن ابی بکرہ اپنے والد کا یہ بیان نقل کرتے ہیں کہ جب نبی اکرم صلی اللہ علیہ وسلم نے طائف کا محاصرہ کیا تو میں صبح سویرے (طائف کے قلعہ سے اتر کر) حضور صلی اللہ علیہ وسلم کی بارگاہ میں حاضر ہوا، حضور صلی اللہ علیہ وسلم نے مجھ سے پوچھا کہ تم نے کیا کیا؟ میں نے کہا: میں صبح سویرے قلعہ سے نکل آیا۔ حضور صلی اللہ علیہ وسلم نے فرمایا ” تم ابوبکرہ “ ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7933]

مقدام بن شریح اپنے والد سے، وہ ان کے دادا سے روایت کرتے ہیں کہ رسول اللہ صلی اللہ علیہ وسلم نے مجھ سے فرمایا: تیرا کونسا بیٹا بڑا ہے؟ میں نے بتایا: شریح۔ آپ صلی اللہ علیہ وسلم نے فرمایا: تو ” ابوشریح “ ہے۔ ٭٭ اس حدیث کو مقدام سے روایت کرنے میں قیس منفرد ہیں۔ اور میں اس کے بعد وہ حدیث بیان کر رہا ہوں جس کو روایت کرنے میں مجالد بن سعید منفرد ہیں۔ اور یہ دونوں ہی ہماری اس کتاب کے معیار کے راوی نہیں ہیں۔ [المستدرك على الصحيحين/كِتَابُ الْأَدَبِ/حدیث: 7934]

مسروق کہتے ہیں: میں سیدنا عمر رضی اللہ عنہ کے پاس آیا، سیدنا عمر رضی اللہ عنہ نے میرا نام پوچھا، میں نے کہا: میرا نام ” مسروق “ ہے۔ آپ نے پوچھا: کس کا بیٹا ہے؟ میں نے بتایا: ابن الاجدع کا۔ سیدنا عمر رضی اللہ عنہ نے فرمایا: تو مسروق بن عبدالرحمن ہے۔ کیونکہ رسول اللہ صلی اللہ علیہ وسلم نے ہمیں فرمایا ہے کہ ”اجدع“ شیطان ہے۔ راوی کہتے ہیں: حکومتی معاملات میں ان کا نام ”مسروق بن عبدالرحمن“ تھا۔ [المستدرك على الصحيحين/كِتَابُ الْأَدَبِ/حدیث: 7935]