سیدنا ابوسعید خدری رضی اللہ عنہ فرماتے ہیں: ایک آدمی نے عرض کی: یا رسول اللہ صلی اللہ علیہ وسلم ، یہ بیماریاں جو ہمیں آتی ہیں، کیا ان میں ہمیں کوئی فائدہ بھی ہوتا ہے؟ حضور صلی اللہ علیہ وسلم نے فرمایا: یہ تمہارے گناہوں کا کفارہ ہیں۔ سیدنا ابی بن کعب رضی اللہ عنہ نے عرض کی: یا رسول اللہ صلی اللہ علیہ وسلم اگرچہ تکلیف تھوڑی سی ہو؟ حضور صلی اللہ علیہ وسلم نے فرمایا: ایک کانٹا بھی کفارہ ہے بلکہ اس سے بھی ہلکی تکلیف آئے، وہ بھی کفارہ ہے۔ اس وقت سیدنا ابی بن کعب رضی اللہ عنہ نے دعا مانگی کہ مرتے دم تک اس کی تکلیف ختم نہ ہو، لیکن ان کی وجہ سے میں حج، عمرہ نماز باجماعت اور جہاد فی سبیل اللہ سے محروم نہ ہو جاؤں۔ راوی کہتے ہیں: اس کے بعد جب بھی کسی نے آپ کے جسم کو ہاتھ لگایا، آپ کو بخار ہوتا تھا۔ وفات تک آپ کا یہی عالم رہا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8051]

سیدنا عقبہ بن عامر جہنی رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: ہر دن کے عمل پر مہر کر دی جاتی ہے۔ جب بندہ مومن بیمار ہوتا ہے تو فرشتے اللہ تعالیٰ کی بارگاہ میں عرض کرتے ہیں: اے ہمارے رب فلاں بندے کو تو نے (بیماری کی بناء پر نیک اعمال سے) روک رکھا ہے، اللہ تعالیٰ فرماتا ہے، جب تک یہ تندرست نہیں ہوتا یا اس کو موت نہیں آتی اس وقت تک تم اس کے نامہ اعمال میں وہ نیکیاں برابر لکھتے رہو، جو یہ صحت کے عالم میں کرتا تھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8052]