سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بندہ جس حالت میں فوت ہو گا، اسی حالت میں قیامت کے دن اٹھایا جائے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8070]

سیدنا سہل بن سعد رضی اللہ عنہ فرماتے ہیں کہ نبی اکرم صلی اللہ علیہ وسلم ایک آدمی کو نصیحت فرما رہے تھے، آپ صلی اللہ علیہ وسلم نے فرمایا: دنیا میں بے رغبتی اختیار کر، اللہ تعالیٰ تجھ سے محبت کرے گا۔ اور ان چیزوں سے بے رغبتی اختیار کر جو لوگوں کے پاس ہے، لوگ بھی تجھ سے محبت کریں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8071]

سیدنا سفیان بن عبداللہ ثقفی رضی اللہ عنہ فرماتے ہیں: میں نے عرض کی: یا رسول اللہ صلی اللہ علیہ وسلم آپ مجھے کوئی ایسی بات ارشاد فرما دیجیے، جس کو میں مضبوطی سے تھام لوں۔ آپ صلی اللہ علیہ وسلم نے فرمایا: تم کہو، میرا رب اللہ ہے، پھر اس پر ثابت قدم ہو جاؤ۔ آپ فرماتے ہیں: میں نے کہا: یا رسول اللہ صلی اللہ علیہ وسلم مجھے سب سے زیادہ کس چیز کی احتیاط کرنی چاہیے، آپ فرماتے ہیں: حضور صلی اللہ علیہ وسلم نے اپنی زبان پکڑ کر فرمایا: اس کی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8072]