سیدنا ابوسفیان اپنے اساتذہ سے روایت کرتے ہیں کہ سیدنا سعد رضی اللہ عنہ سیدنا سلمان کی عیادت کے لیے تشریف لے گئے، سیدنا سلمان رضی اللہ عنہ رو پڑے، سیدنا سعد رضی اللہ عنہ نے کہا: اے ابوعبداللہ! آپ کیوں رہے ہیں؟ حالانکہ رسول اللہ صلی اللہ علیہ وسلم تم سے خوش اس دنیا سے گئے ہیں، تم حضور صلی اللہ علیہ وسلم کے حوض کوثر پر آپ صلی اللہ علیہ وسلم سے ملو گے، تم اپنے ساتھیوں سے ملو گے، سیدنا سلمان رضی اللہ عنہ نے کہا: میں موت کے خوف سے نہیں رو رہا، اور نہ دنیا کی حرص میں رو رہا ہوں، بلکہ (میرے رونے کی وجہ یہ ہے کہ میں حضور صلی اللہ علیہ وسلم سے کیا ہوا وعدہ وفا نہیں کر سکا) آپ صلی اللہ علیہ وسلم نے اپنی زندگی میں بھی اور اپنے بعد کے لیے بھی ہم سے یہ عہد لیا تھا کہ ہمارے پاس دنیا صرف اتنی ہونی چاہیے جتنا مسافر کا سامان ہوتا ہے، اور میرے اردگرد تم یہ تکیے دیکھو، اس وقت ان کے اردگرد، کپڑے دھونے کا ٹب، پانی پینے کا ایک بڑا پیالہ اور ایک لوٹا تھا۔ سیدنا سعد رضی اللہ عنہ نے کہا: اے ابوعبداللہ! آپ ہمیں بھی کوئی وصیت فرما دیں، کہ آپ کے بعد ہم اس پر عمل پیرا ہوں، سیدنا سلمان نے فرمایا: اے سعد! جب تو کوئی ارادہ کرے، تو اپنے ارادے میں خدا کو یاد رکھ، جب تو تقسیم کرے تو اپنے ہاتھ پر خدا کو یاد رکھ اور جب تو فیصلہ کرے تو اپنے فیصلے میں خدا کو یاد رکھ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8089]

سیدنا عبداللہ بن مسعود رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جو شخص سود کھاتا ہے، اس کا انجام ” قل “ ہوتا ہے (یعنی بالآخر وہ تنگدست ہو جاتا ہے) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8090]