ام المومنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”بلاشبہ نیک لوگوں پر آزمائشیں سخت کر دی جاتی ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الرِّقَاقِ/حدیث: 8099]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جس نے اس حال میں صبح کی کہ اس کا (اصل) مقصد اور فکر اللہ کے سوا کچھ اور تھی، تو اس کا اللہ سے کوئی تعلق نہیں؛ اور جو مسلمانوں کے امور (اور ان کے دکھ درد) کی فکر نہیں کرتا، وہ ان میں سے نہیں ہے۔“ [المستدرك على الصحيحين/كِتَابُ الرِّقَاقِ/حدیث: 8100]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”اخلاص اس طرح ہے“ اور آپ صلی اللہ علیہ وسلم نے اپنی اس انگلی سے اشارہ فرمایا جو انگوٹھے کے قریب ہے (یعنی کلمہ کی انگلی)، ”اور دعا اس طرح ہے“ اور آپ صلی اللہ علیہ وسلم نے اپنے دونوں ہاتھ اپنے کندھوں کے برابر اٹھائے، ”اور ابتهال (انتہائی عاجزی سے گڑگڑا کر دعا مانگنا) اس طرح ہے“ اور آپ صلی اللہ علیہ وسلم نے اپنے دونوں ہاتھ اوپر کی طرف پھیلا کر اٹھائے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الرِّقَاقِ/حدیث: 8101]