سیدنا عمر بن خطاب رضی اللہ عنہ سے روایت ہے کہ وہ رسول اللہ صلی اللہ علیہ وسلم کی مسجد کی طرف نکلے تو دیکھا کہ سیدنا معاذ بن جبل رضی اللہ عنہ رسول اللہ صلی اللہ علیہ وسلم کی قبر مبارک کے پاس بیٹھے رو رہے ہیں، آپ نے پوچھا: اے معاذ! تمہیں کس چیز نے رلایا؟ انہوں نے عرض کیا: مجھے اس بات نے رلایا جو میں نے اس قبر والے (یعنی رسول اللہ صلی اللہ علیہ وسلم ) سے سنی تھی، پوچھا: تم نے کیا سنا تھا؟ عرض کیا: میں نے آپ صلی اللہ علیہ وسلم کو فرماتے ہوئے سنا تھا: ”تھوڑا سا دکھاوا (ریا کاری) بھی شرک ہے، اور جس نے اللہ کے کسی ولی سے دشمنی کی تو اس نے اللہ تعالیٰ سے اعلانیہ جنگ کی، اور بے شک اللہ ان گمنام پرہیزگاروں سے محبت کرتا ہے جو اگر غائب ہوں تو انہیں تلاش نہیں کیا جاتا اور اگر حاضر ہوں تو انہیں (مجلس میں) بلایا نہیں جاتا اور نہ ہی انہیں پہچانا جاتا ہے، ان کے دل ہدایت کے چراغ ہیں، وہ ہر تاریک اور گرد آلود فتنے سے (بسلامت) نکل جاتے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الرِّقَاقِ/حدیث: 8131]