سیدنا عطیہ رضی اللہ عنہ فرماتے ہیں کہ میں نبی اکرم صلی اللہ علیہ وسلم کی بارگاہ میں حاضر ہوا، اس وقت حضور صلی اللہ علیہ وسلم بنی سعد بن بکر میں تھے۔ میں لوگوں میں سب سے چھوٹا تھا، اس لیے انہوں نے اپنے کجاوے میں مجھے سب سے پیچھے بٹھایا: جب یہ قافلہ رسول اللہ صلی اللہ علیہ وسلم کی بارگاہ میں پہنچا، سب لوگ طبعی ضروریات سے فارغ ہو گئے، رسول اللہ صلی اللہ علیہ وسلم نے پوچھا: تم میں سے کوئی شخص پیچھے تو نہیں رہا، لوگوں نے بتایا کہ جی ہاں ہمارے ساتھ ایک بچہ بھی ہے، وہ ہمارے کجاوے میں موجود ہے، رسول اللہ صلی اللہ علیہ وسلم نے ان کو حکم دیا کہ اس بچے کو بھی میرے پاس لاؤ، یہ لوگ میرے پاس آئے اور بتایا کہ مجھے رسول اللہ صلی اللہ علیہ وسلم بلا رہے، میں حضور صلی اللہ علیہ وسلم کی بارگاہ میں حاضر ہو گیا، جب آپ صلی اللہ علیہ وسلم نے مجھے دیکھا تو فرمایا: اللہ تعالیٰ نے تجھے خوب غنی کر دیا ہے، تو لوگوں سے کبھی کچھ نہ مانگنا، کیونکہ اوپر والا ہاتھ دینے والا اور نیچے والا ہاتھ لینے والا ہوتا ہے۔ اور اللہ تعالیٰ کے مال کا سوال بھی کیا جاتا ہے اور وہ عطا بھی ہوتا ہے، آپ فرماتے ہیں: رسول اللہ صلی اللہ علیہ وسلم نے میرے ساتھ ہماری زبان میں بات کی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8128]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بوڑھے آدمی کا دل دو چیزوں کی محبت میں ہمیشہ جوان رہتا ہے، لمبی عمر، اور مال کی کثرت۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8129]