سیدنا زید بن اسلم اپنے والد کا یہ بیان نقل کرتے ہیں کہ سیدنا عمر بن خطاب رضی اللہ عنہ مسجد نبوی شریف کی جانب نکلے، تو انہوں نے دیکھا کہ سیدنا معاذ بن جبل رضی اللہ عنہ رسول اللہ صلی اللہ علیہ وسلم کے مزار مبارک کے قریب بیٹھے رو رہے تھے۔ سیدنا عمر رضی اللہ عنہ نے پوچھا کہ اے معاذ تم کیوں رو رہے ہو؟ سیدنا معاذ نے کہا: مجھے ایک بات یاد آ رہی ہے، وہ میں نے اس صاحب مزار سے سنی تھی۔ سیدنا عمر رضی اللہ عنہ نے پوچھا: وہ کون سی بات ہے؟ سیدنا معاذ رضی اللہ عنہ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تھوڑی سی ریاکاری بھی شرک ہے۔ اور جس نے اللہ تعالیٰ کے کسی ولی کے ساتھ دشمنی کی، اس نے اللہ کے ساتھ اعلان جنگ کر دیا ہے۔ اور بے شک اللہ تعالیٰ ان چھپے ہوئے متقی لوگوں کو پسند کرتا ہے جو کسی محفل سے غائب ہوں تو ان کی کمی کوئی محسوس نہیں کرتا، اور اگر کہیں موجود ہوں تو لوگ ان کو پہچانتے نہیں ہیں، ان کے دل ہدایت کے چراغ ہیں، وہ غبار آلود اندھیرے والے مقامات پر ملتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8131]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے ساری خواہشات کو ایک خواہش پر قربان کر دیا، اللہ تعالیٰ اس کے دنیاوی اور اخروی تمام کاموں میں اس کی کفایت کرے گا، اور جس کی خواہشات پھیلی رہیں، اللہ تعالیٰ کوئی پرواہ نہیں کرتا کہ وہ دنیا کی کون سی وادی میں ہلاک ہو رہا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8132]

سیدنا ابوعبیدہ بن الجراح رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ابن آدم کا دل چڑیا کی طرح ہے جو کہ ایک دن میں سات مرتبہ بدلتا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8133]

8134 - سیدنا ابو سعید خدری (رضی اللہ عنہ) سے روایت ہے کہ رسول اللہ صلی اللہ علیہ وسلم نے فرمایا: "اگر تم میں سے کوئی شخص کسی ایسی ٹھوس چٹان کے اندر (چھپ کر) بھی کوئی عمل کرے جس کا نہ کوئی دروازہ ہو اور نہ کوئی سوراخ، تب بھی اللہ تعالیٰ اس کے عمل کو (لوگوں کے سامنے) ظاہر کر دے گا، خواہ وہ عمل کیسا ہی کیوں نہ ہو"۔ [المستدرك على الصحيحين/كِتَابُ الرِّقَاقِ/حدیث: 8134]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: شرک خفی یہ ہے کہ آدمی کسی انسان کو راضی کرنے کے لیے عمل کرے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8135]

یعلیٰ بن شداد بن اوس اپنے والد کا یہ بیان نقل کرتے ہیں کہ ہم رسول اللہ صلی اللہ علیہ وسلم کے زمانے میں ریاء کو چھوٹا شرک قرار دیا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8136]

سیدنا شداد بن اوس رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے دکھاوے کے لیے نماز پڑھی، اس نے شرک کیا، اور جس نے دکھاوے کے لیے روزہ رکھا، اس نے شرک کیا اور جس نے دکھاوے کے لیے زکوۃ دی اس نے شرک کیا۔ [المستدرك على الصحيحين/كِتَابُ الرِّقَاقِ/حدیث: 8137]