عبادہ بن نسی کہتے ہیں کہ میں سیدنا شداد بن اوس رضی اللہ عنہ کے پاس ان کی جائے نماز پر حاضر ہوا تو وہ رو رہے تھے، میں نے پوچھا: اے ابوعبدالرحمن! آپ کو کس چیز نے رلایا؟ انہوں نے کہا: ایک حدیث نے جو میں نے رسول اللہ صلی اللہ علیہ وسلم سے سنی تھی، میں نے عرض کیا: وہ کیا ہے؟ انہوں نے کہا: ایک مرتبہ میں رسول اللہ صلی اللہ علیہ وسلم کے پاس تھا کہ میں نے آپ صلی اللہ علیہ وسلم کے چہرہ مبارک پر ایسی کیفیت دیکھی جس نے مجھے غمگین کر دیا، میں نے عرض کیا: میرے ماں باپ آپ پر قربان ہوں یا رسول اللہ! یہ کیا ہے جو میں آپ کے چہرہ مبارک پر دیکھ رہا ہوں؟ آپ صلی اللہ علیہ وسلم نے فرمایا: ”ایک ایسا معاملہ ہے جس کا میں اپنے بعد اپنی امت پر اندیشہ رکھتا ہوں۔“ میں نے عرض کیا: وہ کیا ہے؟ آپ صلی اللہ علیہ وسلم نے فرمایا: ”شرک اور پوشیدہ خواہشِ نفس (شہوتِ خفیہ)۔“ میں نے عرض کیا: یا رسول اللہ! کیا آپ کے بعد آپ کی امت شرک کرے گی؟ آپ صلی اللہ علیہ وسلم نے فرمایا: ”اے شداد! خبردار! وہ سورج، بت یا پتھر کی عبادت نہیں کریں گے، بلکہ وہ اپنے اعمال میں لوگوں کو دکھاوا کریں گے۔“ میں نے عرض کیا: یا رسول اللہ! کیا ریا کاری شرک ہے؟ آپ صلی اللہ علیہ وسلم نے فرمایا: ”ہاں۔“ میں نے عرض کیا: اور شہوتِ خفیہ کیا ہے؟ آپ صلی اللہ علیہ وسلم نے فرمایا: ”تم میں سے کوئی شخص (نفل) روزہ رکھتا ہے پھر اس کے سامنے دنیا کی خواہشات میں سے کوئی خواہش آتی ہے تو وہ (بلا عذر) اپنا روزہ توڑ دیتا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الرِّقَاقِ/حدیث: 8139]