سیدنا ابن عباس رضی اللہ عنہما سے روایت ہے، انہوں نے فرمایا: ایک ایسی چیز جو تم نہ اللہ کی کتاب میں پاؤ گے اور نہ ہی رسول اللہ صلی اللہ علیہ وسلم کے صریح فیصلے میں، لیکن تمام لوگوں (کے تعامل) میں پاؤ گے وہ یہ ہے کہ: بیٹی کے لیے نصف (1/2) اور بہن کے لیے بھی نصف (1/2) حصہ ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8170]

اسود بن یزید سے روایت ہے کہ سیدنا ابن زبیر رضی اللہ عنہ ایک بیٹی اور ایک بہن کی وراثت کے متعلق فرمایا کرتے تھے: ”پورا مال بیٹی کا ہے“، تو میں نے عرض کیا کہ سیدنا معاذ بن جبل رضی اللہ عنہ نے یمن میں ہمارے درمیان یہ فیصلہ فرمایا تھا کہ بیٹی کے لیے نصف (1/2) اور بہن کے لیے نصف (1/2) ہے، تو ابن زبیر رضی اللہ عنہ نے کہا: ”تم میری طرف سے ولید بن عتبہ (جو اس وقت کوفہ کے قاضی تھے) کے پاس جاؤ اور انہیں حکم دو کہ وہ اسی (معاذ رضی اللہ عنہ والے فیصلے) کے مطابق عمل کریں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8171]