سیدنا ابوبرزہ رضی اللہ عنہ سے روایت ہے کہ سیدنا ابوبکر صدیق رضی اللہ عنہ ایک شخص پر سخت غضبناک ہوئے، میں نے عرض کی: اے خلیفہ رسول! وہ کون ہے؟ انہوں نے پوچھا: کیوں؟ میں نے عرض کی: تاکہ اگر آپ مجھے حکم دیں تو میں اس کی گردن اڑا دوں، راوی کہتے ہیں کہ سیدنا ابوبکر رضی اللہ عنہ نے فرمایا: کیا تم واقعی ایسا کر دیتے؟ میں نے کہا: جی ہاں، تو اللہ کی قسم! میری اس بات نے ان کے غصے کو ختم کر دیا، پھر انہوں نے فرمایا: محمد صلی اللہ علیہ وسلم کے بعد (یہ مقام) کسی کے لیے نہیں ہے۔
یہ حدیث شیخین کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْحُدُودِ/حدیث: 8243]

سیدنا ابوبرزہ اسلمی رضی اللہ عنہ سے روایت ہے کہ ایک شخص نے سیدنا ابوبکر صدیق رضی اللہ عنہ سے بدکلامی کی، میں نے عرض کی: اے خلیفہ رسول! کیا میں اسے قتل نہ کر دوں؟ تو انہوں نے فرمایا: یہ (اختیار) کسی کے لیے نہیں ہے سوائے اس شخص کے جو نبی کریم صلی اللہ علیہ وسلم کی شان میں گستاخی کرے۔ [المستدرك على الصحيحين/كِتَابُ الْحُدُودِ/حدیث: 8244]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جسے تم قومِ لوط والا عمل کرتے ہوئے پاؤ، تو کرنے والے اور جس کے ساتھ کیا گیا ہو دونوں کو قتل کر دو۔“ سلیمان بن بلال کہتے ہیں کہ میں نے یحییٰ بن سعید اور ربیعہ کو یہ کہتے ہوئے سنا ہے کہ جو قومِ لوط والا عمل کرے اسے رجم کیا جائے گا، خواہ وہ شادی شدہ ہو یا غیر شادی شدہ۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْحُدُودِ/حدیث: 8245]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے قومِ لوط والا عمل کیا، تو کرنے والے اور جس کے ساتھ کیا گیا ہو، دونوں کو رجم کر دو۔“ [المستدرك على الصحيحين/كِتَابُ الْحُدُودِ/حدیث: 8246]