سیدنا نعمان بن بشیر رضی اللہ عنہ فرماتے ہیں: ایک آدمی اپنی بیوی کی لونڈی کے ساتھ زنا کا مرتکب ہوا تھا، آپ صلی اللہ علیہ وسلم نے اس کے بارے میں فرمایا: اگر اس کی بیوی نے اس کو اس کے لئے حلال کیا تھا تو اس کو سو کوڑے مارے جائیں اور اگر اس نے اس کو اس کے لئے حلال نہیں کیا تھا تو میں اس کو رجم کروں گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8289]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جو مسلمان اپنے دین کی مخالفت کرے، اس کو قتل کر دو، اور جب بندہ کہے: اشھد ان لا الہ الا اللہ و ان محمدا عبدہ و رسولہ تو ہم اس کو کچھ نہیں کہہ سکتے، البتہ اگر کوئی ایسا جرم کرے گا کہ جس کی بناء پر وہ حد کا مستحق ہوا (تو اس صورت میں اس کی مجوزہ حد اس پر نافذ کی جا سکتی ہے) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8290]

سیدنا عبداللہ بن عباس رضی اللہ عنہما فرماتے ہیں: ایک انصاری شخص اسلام لے آیا، پھر وہ مرتد ہو کر مشرکین سے جا ملا، اس کے بعد پھر نادم ہو گیا اور اس نے اپنی قوم کی جانب پیغام بھیجا کہ وہ رسول اللہ صلی اللہ علیہ وسلم سے میرے بارے میں دریافت کریں کہ میری توبہ کی کوئی گنجائش ہے یا نہیں؟ اس موقع پر یہ آیت نازل ہوئی كَيْفَ يَهْدِي اللَّهُ قَوْمًا كَفَرُوا بَعْدَ إِيمَانِهِمْ وَشَهِدُوا أَنَّ الرَّسُولَ حَقٌّ وَجَاءَهُمُ الْبَيِّنَاتُ (آل عمران: 86) ” کیونکر اللہ اس قوم کی ہدایت چاہے جو ایمان لا کر کافر ہو گئے اور گواہی دے چکے تھے کہ رسول سچا ہے اور انہیں کھلی نشانیاں آ چکی تھیں “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8291]

حارثہ بن مضرب سے مروی ہے کہ فرات بن حیان ابوسفیان کا گارڈ تھا اور حلیف تھا، رسول اللہ صلی اللہ علیہ وسلم نے اس کے قتل کے احکام جاری فرما دیئے ہوئے تھے، یہ انصاریوں کے ایک حلقہ کے پاس سے گزرا، اس نے ان کو بتایا کہ میں مسلمان ہوں، رسول اللہ صلی اللہ علیہ وسلم نے فرمایا: تم میں سے کچھ لوگ ایسے بھی ہیں جن کو ہم نے ان کے ایمان کے سپرد کر دیا ہوا ہے، ان میں سے ” فرات بن حیان “ بھی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8292]