سیدنا عبداللہ بن عباس رضی اللہ عنہما فرماتے ہیں: قریظہ اور نضیر دو قبیلے تھے، اور ایک شخص قریظہ کے امیر لوگوں میں سے تھا، قانون یہ تھا کہ جب قریظہ کا کوئی آدمی نضیر کے کسی آدمی کو قتل کر دیتا تو بدلے میں قریظہ کے آدمی کو بھی قتل کیا جاتا۔ اور جب نضیر کا کوئی آدمی، قریظہ کے کسی آدمی کو قتل کر دیتا تو یہ لوگ کہتے: ہمارا بندہ ہمارے حوالے کر دو، ہم اس کو خود قتل کر دیں گے۔ ان لوگوں نے اس اختلاف میں رسول اللہ صلی اللہ علیہ وسلم کو اپنا ثالث مان لیا۔ پھر یہ لوگ رسول اللہ صلی اللہ علیہ وسلم کی خدمت میں آ گئے، تب یہ آیت نازل ہوئی: وَإِنْ حَكَمْتَ فَاحْكُمْ بَيْنَهُمْ بِالْقِسْطِ إِنَّ اللَّهَ يُحِبُّ الْمُقْسِطِينَ (المائدة: 42) ” اور اگر ان میں فیصلہ فرماؤ تو انصاف سے فیصلہ کرو، بے شک انصاف والے اللہ کو پسند ہیں “ (اس کے بعد قصاص کے احکام بیان ہوئے، پھر) افحکم الجاھلیۃ یبغون والی آیت نازل ہوئی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8293]

ام المومنین سیدہ عائشہ رضی اللہ عنہا فرماتی ہیں کہ نبی اکرم صلی اللہ علیہ وسلم نے ارشاد فرمایا: کسی مسلمان کا خون جائز نہیں ہے سوائے تین جرموں کے۔ ٭ شادی شدہ شخص زنا کرے تو اس کو رجم کر دیا جائے۔ ٭ کوئی شخص جان بوجھ کر کسی کو قتل کر دے تو بدلے میں اس کو قتل کر کے سولی پر لٹکا دیا جائے، یا اسے شہر بدر کر دیا جائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8294]

سیدنا انس بن مالک رضی اللہ عنہ فرماتے ہیں کہ نبی اکرم صلی اللہ علیہ وسلم نے قبیلہ عرینہ کے دہشت گردوں کی آنکھوں میں سلائیاں اس لیے پھروائیں تھیں کہ انہوں نے اونٹوں کے چرواہوں کے ساتھ یہ بیہمانہ سلوک کیا تھا۔ [المستدرك على الصحيحين/كِتَابُ الْحُدُودِ/حدیث: 8295]

مذکورہ اسناد کے ہمراہ بھی سابقہ حدیث مروی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8296]

سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے اپنے غلام کو قتل کیا، ہم اس کو قتل کر دیں گے، اور جس نے اپنے غلام کے جسم کا کوئی حصہ کاٹا، ہم اس کے جسم کا حصہ کاٹ دیں گے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ سیدنا ابوہریرہ رضی اللہ عنہ سے مروی ایک حدیث سابقہ حدیث کی شاہد ہے جیسا کہ درج ذیل ہے۔ [المستدرك على الصحيحين/كِتَابُ الْحُدُودِ/حدیث: 8297]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے اپنے غلام کو قتل کیا، ہم اس کو قتل کر دیں گے اور جس نے اپنے غلام کے جسم کا کوئی حصہ کاٹا ہم اس کے جسم کا وہی حصہ کاٹ دیں گے۔ ٭٭ امام حاکم کہتے ہیں: مجھے خدشہ ہے کہ عثمان بن ہیثم نے پہلی اسناد کا ہی ارادہ کیا ہے، جیسا کہ اس کو یزید بن ہارون نے روایت کیا ہے۔ واللہ اعلم۔ [المستدرك على الصحيحين/كِتَابُ الْحُدُودِ/حدیث: 8298]