سیدنا ابوشہم فرماتے ہیں: میں مدینہ منورہ میں تھا، میرے پاس سے ایک لڑکی گزری، میں نے اس کو پہلو سے پکڑ لیا (لیکن فوراً اس کو چھوڑ دیا، اگلے دن) میں رسول اللہ صلی اللہ علیہ وسلم کی خدمت میں حاضر ہوا، اس وقت حضور صلی اللہ علیہ وسلم صحابہ کرام سے بیعت لے رہے تھے، آپ صلی اللہ علیہ وسلم نے مجھے فرمایا: کیا کل تو نے ایک لڑکی کو نہیں چھیڑا تھا؟ میں نے کہا: یا رسول اللہ صلی اللہ علیہ وسلم ! آج کے بعد میں یہ گناہ کبھی نہیں کروں گا۔ حضور صلی اللہ علیہ وسلم نے ان کی بیعت لے لی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8333]

سیدنا زید بن وہب فرماتے ہیں: سیدنا عبداللہ بن مسعود رضی اللہ عنہ کی خدمت میں ایک آدمی آیا اور کہنے لگا: آپ کو ولید بن عقبہ کی کوئی پرواہ ہے؟ اس کی داڑھی سے شراب کے قطرے ٹپک رہے ہوتے ہیں؟ سیدنا عبداللہ بن مسعود رضی اللہ عنہ نے فرمایا: رسول اللہ صلی اللہ علیہ وسلم نے ہمیں جاسوسی کرنے سے منع فرمایا ہے، ہاں اگر کوئی گناہ ہمارے سامنے آ جائے تو ہم اس کا مواخذہ ضرور کرتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8334]