سیدنا عبدالرحمن بن عوف رضی اللہ عنہ کے بارے میں مروی ہے کہ انہوں نے ایک رات مدینہ منورہ میں سیدنا عمر بن خطاب رضی اللہ عنہ کے ہمراہ چوکیدار کے طور پر گزاری، (آپ فرماتے ہیں) ہم لوگ چل رہے تھے کہ ہمیں ایک گھر میں چراغ کی روشنی دکھائی دی، ہم لوگ اسی کی جانب چل دیئے، جب ہم اس گھر کے قریب پہنچے تو دروازہ کھلا ہوا تھا، گھر میں لوگ بھی موجود تھے، اور بہت آوازیں بلند ہو رہی تھیں، سیدنا عمر رضی اللہ عنہ نے سیدنا عبدالرحمن کا ہاتھ تھاما اور بولے: تمہیں معلوم ہے کہ یہ گھر کس کا ہے؟ سیدنا عبدالرحمن نے کہا: نہیں۔ سیدنا عمر رضی اللہ عنہ نے ان کو بتایا کہ یہ گھر ربیعہ بن امیہ بن خلف کا ہے، اور یہ لوگ اس وقت شراب کے نشے میں بدمست ہیں۔ تمہارا کیا خیال ہے؟ سیدنا عبدالرحمن رضی اللہ عنہ نے فرمایا: میرا خیال ہے کہ ہم نے اللہ تعالیٰ کے حکم کی نافرمانی کی ہے، اللہ تعالیٰ نے ارشاد فرمایا ہے: لَا تَجَسَّسُوْا (الحجرات: 12) ” جاسوسی مت کرو “ اللہ تعالیٰ نے تو ہمیں جاسوسی کرنے سے منع فرمایا ہے، اور ہم نے جاسوسی کی ہے، چنانچہ سیدنا عمر رضی اللہ عنہ ان کو اسی طرح چھوڑ کر واپس تشریف لے گئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8335]

سیدنا ابوامامہ باہلی رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: امیر جب لوگوں میں شک ڈھونڈتا ہے تو وہ لوگوں کو خراب کر لیتا ہے۔ [المستدرك على الصحيحين/كِتَابُ الْحُدُودِ/حدیث: 8336]