سیدنا ابوبردہ بن نیار رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: حد نہ لگتی ہو تو سزا کے طور پر دس سے زیادہ کوڑے نہ مارے جائیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8351]

حارث بن حاطب فرماتے ہیں: رسول اللہ صلی اللہ علیہ وسلم کے زمانے میں ایک آدمی نے چوری کر لی، اس کو رسول اللہ صلی اللہ علیہ وسلم کی بارگاہ میں پیش کر دیا گیا، آپ صلی اللہ علیہ وسلم نے فرمایا: اس کو قتل کر دو، صحابہ کرام رضی اللہ عنہم نے عرض کی، یا رسول اللہ صلی اللہ علیہ وسلم اس نے صرف چوری کی ہے، حضور صلی اللہ علیہ وسلم نے فرمایا: تو اس کے ہاتھ کاٹ دو۔ اس نے پھر چوری کی، پھر اس نے سیدنا ابوبکر صدیق رضی اللہ عنہ کے دور خلافت میں بھی چوری کی، پھر اس کا پاؤں کاٹ دیا گیا، وہ چوریاں کرنے سے باز نہ آیا، اور سزا پاتا رہا، حتیٰ کہ جب اس نے پانچویں مرتبہ چوری کی تو سیدنا ابوبکر صدیق رضی اللہ عنہ نے فرمایا: رسول اللہ صلی اللہ علیہ وسلم اس بدبخت کو زیادہ جانتے تھے، تبھی تو آپ صلی اللہ علیہ وسلم نے اس کے قتل کا حکم دیا تھا، (پھر سیدنا ابوبکر رضی اللہ عنہ نے فرمایا) اس کو لے جاؤ اور قتل کر دو، اس کو قریش کی ایک جماعت کے سپرد کر دیا گیا، اس جماعت میں سیدنا عبداللہ بن زبیر رضی اللہ عنہ بھی تھے، سیدنا عبداللہ بن زبیر رضی اللہ عنہ نے اپنی جماعت سے کہا: تم مجھے اپنا امیر بنا لو، ان لوگوں نے سیدنا عبداللہ بن زبیر رضی اللہ عنہ کو اپنا امیر بنا لیا، پھر سیدنا عبداللہ نے اس کو مارنا شروع کیا تو لوگ بھی مارنے لگ گئے، اس کو اتنا مارا کہ وہ مر گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8352]