سیدنا ابی بن کعب رضی اللہ عنہ فرماتے ہیں: میں نبی اکرم صلی اللہ علیہ وسلم کی خدمت میں موجود تھا، ایک دیہاتی آپ صلی اللہ علیہ وسلم کے پاس آیا اور کہنے لگا: اے اللہ کے نبی! میرے بھائی کو بہت شدید درد ہے، آپ صلی اللہ علیہ وسلم نے پوچھا: کس چیز کا درد ہے؟ اس نے بتایا کہ اس کو تھوڑی سی دیوانگی ہے، حضور صلی اللہ علیہ وسلم نے فرمایا: اس کو میرے پاس لے کر آؤ، میں اپنے بھائی کو لے کر آیا اور حضور صلی اللہ علیہ وسلم کے سامنے لٹا دیا، نبی اکرم صلی اللہ علیہ وسلم نے اس کو سورہ فاتحہ، سورہ بقرہ کی آخری 4 آیتیں، اور درج ذیل دو آیتیں وَإِلَهُكُمْ إِلَهٌ وَاحِدٌ لَا إِلَهَ إِلَّا هُوَ الرَّحْمَنُ الرَّحِيمُ آیت الکرسی، اور سورہ آل عمران کی آیت نمبر 18 جو کہ شَهِدَ اللَّهُ أَنَّهُ لَا إِلَهَ إِلَّا هُوَ سے شروع ہوتی ہے، اور سورہ اعراف کی یہ آیت إِنَّ رَبُّكُمُ اللَّهُ الَّذِي خَلَقَ السَّمَوَاتِ وَالْأَرْضَ اور سورہ مومنون کی آخری آیات فَتَعَالَى اللَّهُ الْمَلِكُ الْحَقُّ سورہ جن کی آیت نمبر 3 وَأَنَّهُ تَعَالَى جَدُّ رَبِّنَا مَا اتَّخَذَ صَاحِبَةً وَلَا وَلَدًا سورہ صافات کی شروع کی 10 آیات، سورہ حشر کی آخری تین آیات، سورہ اخلاص، سورۃ الناس اور سورۃ الفلق۔ پڑھ کر دم کیا۔ وہ شخص فوراً ہی اٹھ کر کھڑا ہو گیا اور وہ اس طرح ٹھیک ہو گیا جیسے اس کو کوئی تکلیف آئی ہی نہیں تھی۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے اس حدیث کے تمام راویوں کی روایات نقل کی ہیں۔ سوائے ابوجناب کلبی کے اور یہ حدیث محفوظ ہے، صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8474]

سیدنا سہل بن حنیف فرماتے ہیں: ہم سیلاب کے پانی کے پاس سے گزرے، میں نے اس میں گھس کر نہا لیا، جب میں نہا کر نکلا تو مجھے بخار ہو چکا تھا، حضور صلی اللہ علیہ وسلم کو اس واقعہ کی اطلاع دی گئی، آپ صلی اللہ علیہ وسلم نے فرمایا: ابوثابت کو کہو کہ تعویذ لے لے، میں نے کہا: یا رسول اللہ صلی اللہ علیہ وسلم دم نہ کروا لوں؟ آپ صلی اللہ علیہ وسلم نے فرمایا: نہیں۔ دم تو سانس کی بیماری یا بخار یا کاٹے کا ہوتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرُّقَى وَالتَّمَائِمِ/حدیث: 8475]