سیدنا حذیفہ رضی اللہ عنہ فرماتے ہیں: دلوں پر فتنے ڈالیں جائیں گے، جو دل اس کا انکار کرے گا، اس کے دل پر ایک سفید نکتہ لگا دیا جائے گا، جو دل اس کا انکار نہیں کرے گا اس پر ایک سیاہ نکتہ لگا دیا جائے گا، اس کے بعد ایک اور فتنہ دلوں پر آئے گا، اگر دل اس کا انکار کرے گا تو پہلی مرتبہ کی طرح اب بھی اس پر ایک سفید نشان لگا دیا جائے گا اور اگر اسے ناپسند نہیں کرے گا تو اس پر پہلی مرتبہ کی طرح سیاہ نکتہ لگا دیا جائے گا، اس کے بعد ایک اور فتنہ آئے گا، اگر دل اس کو برا جانے گا تو اس پر پہلے سے زیادہ گہرا سفید نشان لگا دیا جائے گا اور اس کو صاف ستھرا کر دیا جائے گا، اور اس کے بعد کوئی فتنہ اس کو نقصان نہیں دے گا، اور اگر اس کو سابقہ دو موقعوں کی مانند ناپسند نہیں کرے گا، اس پر پہلی دو مرتبہ سے بھی زیادہ سخت کالا دھبہ لگا دیا جائے گا، یہ دل بالکل اوندھا ہو جائے گا، اس کے بعد وہ نہ حق کو پہچان سکے گا اور نہ برائی کو برا سمجھے گا۔ (العیاذ باللہ) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8652]