سیدنا ابوذر رضی اللہ عنہ فرماتے ہیں کہ ہم رسول اللہ صلی اللہ علیہ وسلم کے پاس موجود تھے، ہمارے درمیان یہ بحث چل نکلی کہ بیت المقدس اور مسجد نبوی میں سے افضل کون سی مسجد ہے؟ رسول اللہ صلی اللہ علیہ وسلم نے فرمایا: میری اس مسجد میں نماز پڑھنے کا ثواب، بیت المقدس میں نماز پڑھنے سے چار گنا زیادہ ہے، اور یہ کتنی ہی اچھی نماز پڑھنے کی جگہ ہے، عنقریب وہ زمانہ آنے والا ہے جب لوگوں کے پاس اپنے گھوڑے کی رسی جتنی زمین بھی نہیں ہو گی کہ وہاں سے وہ بیت المقدس کی زیارت ہی کر سکے، اور اتنی جگہ مل جانا بھی ان کے لئے دنیا و مافیہا سے بہتر ہو گا، راوی کو شک ہے کہ حضور صلی اللہ علیہ وسلم نے اس جگہ ” خير لہ من الدنيا جميعا “ فرمایا یا:” خیر من الدنیا و ما فیہا “ فرمایا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8764]