ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: لوگ قیامت کے دن ننگے بدن، ننگے پاؤں اور غیر مختون اٹھائے جائیں گے، ام المومنین سیدہ عائشہ رضی اللہ عنہا نے عرض کی: یا رسول اللہ صلی اللہ علیہ وسلم لوگوں کی شرمگاہوں کا کیا بنے گا؟ آپ صلی اللہ علیہ وسلم نے فرمایا: اس دن ہر شخص ایسی مصیبت میں گرفتار ہو گا جو اس کو ایسی تمام چیزوں سے بے نیاز کر دے گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اضافے کے ہمراہ نقل نہیں کیا۔ تاہم امام بخاری رحمۃ اللہ علیہ اور امام مسلم رحمۃ اللہ علیہ دونوں نے عمرو بن دینار اور مغیرہ بن نعمان کی دو طویل روایات نقل کی ہیں جو انہوں نے سعید بن جبیر کے واسطے سے سیدنا عبداللہ بن عباس رضی اللہ عنہما سے روایت کی ہے، لیکن ان میں عورات کا ذکر نہیں ہے۔ [المستدرك على الصحيحين/كِتَابُ: الْأَهْوَالِ/حدیث: 8898]

سیدنا ابوذر رضی اللہ عنہ فرماتے ہیں کہ مجھے صادق و مصدوق علیہ السلام نے بتایا ہے کہ قیامت کے دن لوگ تین گروہوں میں اٹھائے جائیں گے، ایک جماعت سیر شدہ، لباس پہنے ہوئے اور سواریوں پر سوار ہو گی، ایک جماعت پیدل چلتے اور دوڑتے ہو گی اور ایک جماعت کے لوگوں کو فرشتے منہ کے بل گھسیٹ کر دوزخ میں پھینکیں گے۔ ہم نے کہا: اے ابوذر! ہم ان سب کو پہچانتے ہیں، ان لوگوں کا کیا حال ہو گا جو پیدل چل رہے ہوں گے اور دوڑ رہے ہوں گے؟ انہوں نے فرمایا: اللہ تعالیٰ ان کی پشت پر مصیبت نازل فرمائے گا جس کی وجہ سے ان کی پشت ہی نہیں رہے گی۔ ٭٭ یہ حدیث ولید بن جمیع تک صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8899]

بہز بن حکیم بن معاویہ اپنے والد سے، وہ ان کے دادا سے روایت کرتے ہیں (وہ فرماتے ہیں کہ) میں نے عرض کی: یا رسول اللہ صلی اللہ علیہ وسلم آپ مجھے کہاں کا حکم دیتے ہیں؟ آپ میرے لئے کوئی خطہ پسند فرمایئے، راوی کہتے ہیں: آپ صلی اللہ علیہ وسلم نے اپنے ہاتھ سے ملک شام کی جانب اشارہ کر کے فرمایا: تم سوار اور پیدل اور کچھ اپنے چہروں کے بل گھسیٹتے ہوئے یہاں پر جمع کئے جاؤ گے۔ یہ کہتے ہوئے، آپ صلی اللہ علیہ وسلم نے اپنے دست مبارک سے اشارہ فرمایا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اسی حدیث کو ابوقزعہ سوید بن حجیر نے حکیم بن معاویہ سے بہر کی روایت کی طرح نقل کیا ہے، لیکن بہز بھی مامون ہیں ان کی روایت کے لئے کسی متابع کی حاجت نہیں ہوتی۔ [المستدرك على الصحيحين/كِتَابُ: الْأَهْوَالِ/حدیث: 8900]