ابوقزعہ حکیم بن معاویہ سے، وہ اپنے والد سے، اور وہ ان کے دادا سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: تم یہاں پر ننگے بدن، ننگے پاؤں، پیدل اور سوار جمع کئے جاؤ گے اور کچھ لوگوں کو ان کے چہرے کے بل گھسیٹ کر لایا جائے گا، تم سب کو اللہ تعالیٰ کی بارگاہ میں پیش کیا جائے گا، تمہارے منہ پر پٹی باندھ دی جائے گی اور تمہارے اعضاء میں سب سے پہلے ران ظاہر ہوں گی۔ [المستدرك على الصحيحين/كِتَابُ: الْأَهْوَالِ/حدیث: 8901]

سیدنا نعمان بن سعد بیان کرتے ہیں کہ ہم سیدنا علی بن ابی طالب رضی اللہ عنہ کے پاس بیٹھے ہوئے تھے، آپ نے يَوْمَ نَحْشُرُ الْمُتَّقِينَ إِلَى الرَّحْمَنِ وَفْدًا [مريم: 85] پڑھی اور فرمایا: اللہ کی قسم! وہ اپنے قدموں پر چل کر میدان محشر میں نہیں آئیں گے اور نہ ان کو چلایا جائے گا، بلکہ ان کو جنتی سواریوں پر سوار کر کے لایا جائے گا، اس جیسی سواری مخلوق نے کبھی دیکھی ہی نہیں ہو گی، ان کے کجاوے سونے کے ہوں گے، ان کی لگامیں زبرجد کی ہوں گی، وہ ان کجاوں پر جلوہ گر ہوں گے حتی کہ جنت کا دروازہ کھٹکھٹائیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8902]