داؤد بن ابی ہند بیان کرتے ہیں کہ نافع بن ازرق نے سیدنا عبداللہ بن عباس رضی اللہ عنہما سے ان آیات کے بارے میں پوچھا هَذَا يَوْمُ لَا يَنْطِقُونَ} [المرسلات: 35] ” یہ دن ہے کہ وہ نہ بول سکیں گے “ وَ {لَا تَسْمَعُ إِلَّا هَمْسًا} ” تو نہ سنے گا مگر بہت آہستہ آواز {وَأَقْبَلَ بَعْضُهُمْ عَلَى بَعْضٍ يَتَسَاءَلُونَ} [الصافات: 27] ” اور ان میں ایک نے دوسرے کی طرف منہ کیا، آپس میں پوچھتے ہوئے بولے “ {هَاؤُمُ اقْرَءُوا كِتَابِيَهْ} ”کہے گا لو میرے نامہ اعمال پڑھو “ ان کا کیا مطلب ہے؟ سیدنا عبداللہ بن عباس رضی اللہ عنہما نے فرمایا: تیرے لئے ہلاکت ہو، کیا تو نے مجھ سے پہلے ان آیات کے بارے میں کسی سے پوچھا؟ اس نے کہا: نہیں۔ آپ نے فرمایا: اچھا کیا۔ اگر تو کسی سے پوچھ لیتا تو مارا جاتا، کیا اللہ تعالیٰ نے یہ نہیں فرمایا: {وَإِنَّ يَوْمًا عِنْدَ رَبِّكَ كَأَلْفِ سَنَةٍ مِمَّا تَعُدُّونَ} [الحج: 47] ” اور بے شک تمہارے رب کے یہاں ایک دن ایسا ہے جیسے تم لوگوں کی گنتی میں ہزار برس “ اس نے کہا: جی ہاں۔ ان ایام میں سے ہر دن کی ایک مقدار ہے اور رنگوں میں سے ایک رنگ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8925]

امام ابوبکر محمد بن اسحاق بن خزیمہ بیان کرتے ہیں کہ میں نے یونس بن عبدالاعلی صدفی سے سیدنا عبداللہ بن وہب کی وفات کا سبب پوچھا تو انہوں نے فرمایا: ان کے سامنے کتاب الاہوال اکثر پڑھی جاتی تھی، ایک دفعہ آخرت کا کوئی قصہ پڑھا گیا، وہ سنتے ہی ان پر بیہوشی طاری ہو گئی، ہم نے ان کو اٹھا کر گھر پہنچایا، اس دن سے وہ بیمار ہوئے اور اس بیماری سے جانبر نہ ہو سکے اور وفات پا گئے۔ [المستدرك على الصحيحين/كِتَابُ: الْأَهْوَالِ/حدیث: 8926]

سیدنا حذیفہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کے دن میں تمام لوگوں کا سردار ہوں گا، میرا رب مجھے بلائے گا، میں جواباً کہوں گا: میں حاضر ہوں، اور نیک بختی تیرے ہاتھ میں ہے، تو ہی برکت والا ہے، میں حاضر ہوں، اور ہدایت یافتہ وہی ہے جس کو تو ہدایت دے اور تیرا بندہ تیرے سامنے حاضر ہے، کوئی نجات کی جگہ اور کوئی پناہ گاہ تیرے سوا کوئی نہیں ہے، تو ہی برکت والا ہے، اے بیت اللہ کے رب۔ اور آپ صلی اللہ علیہ وسلم نے فرمایا: کسی پاکدامنہ پر تہمت لگانے سے ایک سال کے نیک اعمال برباد ہو جاتے ہیں۔ امام مسلم نے اس حدیث کو شاہد کے طور پر نقل کیا ہے۔ [المستدرك على الصحيحين/كِتَابُ: الْأَهْوَالِ/حدیث: 8927]

ام درداء رضی اللہ عنہا فرماتی ہیں: میں نے ابوالدرداء رضی اللہ عنہ سے کہا: جس طرح لوگ اپنے مہمانوں کے لئے تکلف کرتے ہیں، آپ اپنے مہمانوں کے لئے ایسا کیوں نہیں کرتے؟ آپ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تمہارے سامنے ایک خاردار گھاٹی ہے۔ بھاری بوجھ والے اس سے گزر نہیں سکیں گے، اس لئے میں اس گھاٹی سے گزرنے کے لئے اپنا بوجھ ہلکا رکھنا چاہتا ہوں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8928]

ابوعثمان نہدی رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: قیامت کے دن آدمی کا صحیفہ اٹھایا جائے گا، انسان کا کیا ہوا ہر ظلم اس وقت تک اس کے تعاقب میں رہے گا جب تک کہ اس کے نامہ اعمال میں ایک بھی نیکی باقی ہو گی، پھر (جب لوگوں کو دینے کے لئے نیکیاں ختم ہو جائیں گی تو) لوگوں کے گناہ اس کے نامہ اعمال میں ڈالے جانے لگیں گے، عاصم نے ابوعثمان سے پوچھا: اے ابوعثمان آپ یہ حدیث کس کے حوالے سے بیان کر رہے ہیں؟ انہوں نے کہا: سلمان سے، سعد سے، اور ابن مسعود سے، یوں انہوں نے چھ یا سات صحابہ کرام کے نام گنوا دیئے، سیدنا شعبہ فرماتے ہیں: میں نے عاصم سے اس حدیث کے بارے میں پوچھا تو انہوں نے فرمایا: یہ حدیث مجھے ابوعثمان نے سلمان کے واسطے سے بیان کی ہے، اور عثمان بن عتاب نے مجھے بتایا ہے کہ انہوں نے ابوعثمان کو سلمان کے واسطے سے اور دیگر کئی صحابہ کرام کے واسطے سے یہ حدیث بیان کرتے ہوئے سنا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8929]