سیدنا جابر بن عبداللہ رضی اللہ عنہما مجھے ایک صحابی کے حوالے سے قصاص کے بارے میں ایک حدیث معلوم ہوئی ہے جو کہ میں نے خود ان سے نہیں سنی تھی، میں نے اس کے لئے ایک اونٹ خریدا، اپنا رخت سفر باندھا، پھر میں پورے ایک مہینے کا سفر کر کے مصر یا شام پہنچا، میں سیدنا عبداللہ بن انیس رضی اللہ عنہ کے پاس گیا، اور عرض کی: مجھے پتا چلا ہے کہ آپ قصاص کے بارے میں رسول اللہ صلی اللہ علیہ وسلم کا کوئی فرمان بیان کرتے ہیں، وہ میں نے نہیں سنا، مجھے ڈر تھا کہ کہیں وہ فرمان مصطفی سننے سے پہلے کہیں موت نہ آ جائے، تب سیدنا عبداللہ رضی اللہ عنہ نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ جس دن لوگوں کو ننگے بدن اور ننگے پاؤں جمع کیا جائے گا، ان کے جسم پر کوئی چیز نہ ہو گی پھر ان کو ایسی آواز میں نداء دی جائے گی، جو قریب و بعید سے یکساں سنائی دے گی، کہنے والا کہے گا: میں بادشاہ ہوں، میں بدلہ دینے والا ہوں، کسی جنتی کو جنت میں اور کسی دوزخی کو دوزخ میں اس وقت تک جانے کی اجازت نہیں ہے جب تک میں اس کے تمام مظالم کا بدلہ نہ لے لوں، حتی کہ کسی کو طمانچہ بھی مارا ہو گا تو اس کا بھی بدلہ لوں گا، راوی کہتے ہیں: ہم نے کہا: جب ہم اللہ تعالیٰ کی بارگاہ میں ننگے پاؤں، ننگے بدن خالی ہاتھ حاضر ہوں گے تو بدلہ کس چیز سے دلوایا جائے گا؟ آپ صلی اللہ علیہ وسلم نے فرمایا: نیکیوں اور برائیوں کے ساتھ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8930]