جناب ابن ابی ملیکہ کہتے ہیں کہ ”مجھے سیدنا عقبہ بن حارث رضی اللہ عنہ نے بیان کیا، اور مجھے یہ روایت میرے ایک اور ساتھی نے بھی سیدنا عقبہ رضی اللہ عنہ سے بیان کی اور اپنے ساتھی کی روایت مجھے زیادہ یاد ہے، انہوں نے کہا کہ ”میں نے ام یحییٰ بنت ابی اہاب سے شادی کی، تو ہمارے پاس ایک کالی عورت آئی اور اس نے کہا کہ میں نے ان دونوں کو دودھ پلایا ہے، تو میں نبی کریم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم سے یہ واقعہ بیان کیا، تو آپ صلی اللہ علیہ وسلم نے مجھ سے منہ پھیر لیا، میں نے عرض کیا: ”اے اللہ کے رسول! بیشک وہ جھوٹی ہے“، آپ صلی اللہ علیہ وسلم نے فرمایا: ”تجھے کیا خبر؟ حالانکہ اس نے جو کہنا تھا کہہ دیا ہے، اس عورت (اپنی بیوی) کو چھوڑ دے۔“““ [سنن ابي داود/كِتَاب الْأَقْضِيَةِ/حدیث: 3603]

ابن ابی ملیکہ نے بواسطہ عبید بن ابی مریم سیدنا عقبہ بن حارث رضی اللہ عنہ سے روایت کیا، ابن ابی ملیکہ نے کہا: ”میں نے یہ روایت سیدنا عقبہ رضی اللہ عنہ سے بھی سنی ہے مگر مجھے عبید کا بیان زیادہ ضبط ہے“ اور مذکورہ بالا حدیث کے ہم معنی بیان کیا۔ امام ابوداؤد رحمہ اللہ فرماتے ہیں کہ حماد بن زید نے حارث بن عمیر کو دیکھا اور کہا: ”یہ ایوب کے معتمد شاگردوں میں سے ہے۔“ [سنن ابي داود/كِتَاب الْأَقْضِيَةِ/حدیث: 3604]