سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے کسی (مشترک) مملوک میں سے اپنا حصہ آزاد کر دیا ہو تو اس (آزاد کرنے والے) پر غلام کی عادلانہ قیمت لگائی جائے اور وہ اپنے شریکوں کے حصے انہیں ادا کر دے اور اس کی طرف سے غلام کو آزاد کیا جائے۔ ورنہ اس سے جو آزاد ہو گیا، سو ہو گیا۔“ [سنن ابي داود/كِتَاب الْعِتْق/حدیث: 3940]

جناب نافع نے بواسطہ سیدنا ابن عمر رضی اللہ عنہ نبی کریم صلی اللہ علیہ وسلم سے ”مذکورہ بالا حدیث کے ہم معنی روایت کیا“۔ ایوب کہتے ہیں کہ: ”جناب نافع کبھی تو «فَقَدْ عَتَقَ مِنْهُ عِتْقٌ» کے لفظ ذکر کرتے اور کبھی نہ کرتے۔“ [سنن ابي داود/كِتَاب الْعِتْق/حدیث: 3941]

ایوب نے نافع سے، انہوں نے ابن عمر رضی اللہ عنہ سے، انہوں نے نبی کریم صلی اللہ علیہ وسلم سے یہ حدیث روایت کی۔ ایوب نے کہا: ”مجھے نہیں معلوم کہ حدیث میں یہ جملہ «وَإِلَّا عَتَقَ مِنْهُ عَتَقَ» نبی کریم صلی اللہ علیہ وسلم کا فرمایا ہوا ہے یا نافع کی طرف سے ہے۔“ [سنن ابي داود/كِتَاب الْعِتْق/حدیث: 3942]

نافع سیدنا ابن عمر رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”جس نے اپنے مملوک کا حصہ آزاد کر دیا ہو تو اس پر لازم ہے کہ اسے پورے کو آزاد کرے، اگر اس کے پاس اس کی قیمت کے بقدر مال ہو، اگر اس کے پاس مال نہ ہو تو اس کا وہی حصہ آزاد ہوا (جو کیا گیا)۔“ [سنن ابي داود/كِتَاب الْعِتْق/حدیث: 3943]

جناب نافع نے سیدنا ابن عمر رضی اللہ عنہما سے، انہوں نے نبی کریم صلی اللہ علیہ وسلم سے ابراہیم بن موسیٰ کی (مذکورہ بالا) روایت کے ہم معنی روایت کیا۔ [سنن ابي داود/كِتَاب الْعِتْق/حدیث: 3944]

جناب نافع نے سیدنا ابن عمر رضی اللہ عنہ سے، انہوں نے نبی کریم صلی اللہ علیہ وسلم سے مذکورہ روایت مالک (3940) کے ہم معنی بیان کی۔ مگر اس میں «وَإِلَّا فَقَدْ عَتَقَ مِنْهُ عَتَقَ» کا ذکر نہیں۔ اس کی حدیث «وَأُعْتِقَ عَلَيْهِ الْعَبْدُ» پر مکمل ہوئی ہے جو اسی کے ہم معنی ہے۔ [سنن ابي داود/كِتَاب الْعِتْق/حدیث: 3945]

سیدنا ابن عمر رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جس نے کسی مشترک غلام میں سے اپنا حصہ آزاد کر دیا تو اس کا باقی حصہ بھی اس کے مال سے آزاد کیا جائے گا، جبکہ اس کے پاس غلام کی قیمت کے بقدر مال موجود ہو۔“ [سنن ابي داود/كِتَاب الْعِتْق/حدیث: 3946]

جناب سالم اپنے والد (سیدنا عبداللہ بن عمر رضی اللہ عنہ) سے روایت کرتے ہیں، وہ نبی کریم صلی اللہ علیہ وسلم سے روایت کرتے ہیں کہ ”جب کوئی غلام دو آدمیوں میں مشترک ہو اور ان میں سے ایک اپنا حصہ آزاد کر دے تو اگر وہ صاحبِ وسعت ہو تو اس کی طرف سے غلام کی قیمت لگا کر اسے آزاد کر دیا جائے، قیمت لگانے میں کمی کی جائے نہ زیادتی۔“ [سنن ابي داود/كِتَاب الْعِتْق/حدیث: 3947]

ابن التلب (ابن التلب ملقام) اپنے والد رضی اللہ عنہ سے روایت کرتے ہیں کہ ایک شخص نے (مشترک) مملوک میں سے اپنا حصہ آزاد کر دیا تو نبی کریم صلی اللہ علیہ وسلم نے اسے باقی کا ضامن اور ذمہ دار نہیں بنایا تھا۔ امام احمد رحمہ اللہ فرماتے ہیں کہ: ”راوی (ابن التلب) ”تا“ کے ساتھ ہے اور شعبہ رحمہ اللہ قدرے توتلے تھے، ”تا“ (دو نقطے والے) کو ”ثا“ (تین نقطے والے) سے نمایاں نہ کر سکتے تھے۔“ [سنن ابي داود/كِتَاب الْعِتْق/حدیث: 3948]