سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم جب کوئی نیا کپڑا حاصل کرتے تو اس کا نام لیتے، یعنی قمیص یا پگڑی وغیرہ اور یہ دعا پڑھتے: «اللَّهُمَّ لَكَ الْحَمْدُ، أَنْتَ كَسَوْتَنِيهِ، أَسْأَلُكَ مِنْ خَيْرِهِ وَخَيْرِ مَا صُنِعَ لَهُ، وَأَعُوذُ بِكَ مِنْ شَرِّهِ وَشَرِّ مَا صُنِعَ لَهُ» ”اے اللہ! تیری ہی تعریف ہے، تو نے مجھے یہ پہنایا ہے، میں تجھ سے اس کی خیر اور بھلائی کا سوال کرتا ہوں اور اس بھلائی کا جس کے لیے اسے بنایا گیا ہے، میں اس کے شر سے تیری پناہ چاہتا ہوں اور اس شر سے جس کے لیے اسے بنایا گیا ہے۔“ ابونضرہ رحمہ اللہ نے کہا: ”نبی کریم صلی اللہ علیہ وسلم کے صحابہ رضی اللہ عنہم میں سے جب کوئی نیا کپڑا پہنتا تو اسے یوں دعا دی جاتی: «تُبْلَى وَيُخْلِفُ اللَّهُ تَعَالَى» ”اللہ کرے تم اسے خوب (استعمال کر کے) پرانا کرو اور اللہ اس کے بعد اور بھی عنایت فرمائے۔““ [سنن ابي داود/كِتَاب اللِّبَاسِ/حدیث: 4020]

مسدد نے بیان کیا، انہوں نے کہا: ”ہمیں عیسیٰ بن یونس نے بواسطہ جریری بیان کیا، انہوں نے اپنی سند سے مذکورہ بالا کی مانند روایت کیا۔“ [سنن ابي داود/كِتَاب اللِّبَاسِ/حدیث: 4021]

مسلم بن ابراہیم نے بیان کیا، انہوں نے کہا: ہمیں محمد بن دینار نے بیان کیا، بواسطہ جریری کے، انہوں نے اپنی سند سے مذکورہ بالا کے ہم معنی روایت کیا۔ امام ابوداؤد رحمہ اللہ نے کہا: ”عبدالوہاب ثقفی نے اپنی سند میں سیدنا ابوسعید خدری رضی اللہ عنہ کا ذکر نہیں کیا۔“ اور حماد بن سلمہ نے کہا: «عَنِ الْجُرَيْرِيِّ، عَنْ أَبِي الْعَلَاءِ، عَنِ النَّبِيِّ صلی اللہ علیہ وسلم » ”جریری سے، انہوں نے ابوالعلاء سے، انہوں نے نبی صلی اللہ علیہ وسلم سے روایت کیا۔“ امام ابوداؤد رحمہ اللہ نے کہا: ”حماد بن سلمہ اور (عبدالوہاب ثقفی) ثقفی دونوں کا سماع ایک جیسا ہے (دونوں مرسل بیان کرتے ہیں)۔“ [سنن ابي داود/كِتَاب اللِّبَاسِ/حدیث: 4022]

جناب سہل اپنے والد سیدنا معاذ بن انس رضی اللہ عنہ سے بیان کرتے ہیں کہ رسول اللہ صلی اللہ علیہ وسلم نے فرمایا: ”جو شخص کھانا کھانے کے بعد یوں دعا کرے: «الْحَمْدُ لِلَّهِ الَّذِي أَطْعَمَنِي هَذَا الطَّعَامَ وَرَزَقَنِيهِ مِنْ غَيْرِ حَوْلٍ مِنِّي وَلَا قُوَّةٍ» ”حمد اس اللہ کی جس نے مجھے یہ کھانا کھلایا اور بغیر میری کسی کوشش و قوت کے مجھے یہ رزق عنایت فرمایا“ تو اس کے اگلے اور پچھلے سب گناہ بخش دیے جاتے ہیں۔“ فرمایا: ”اور جو کوئی کپڑا پہنے پھر یہ دعا کرے: «الْحَمْدُ لِلَّهِ الَّذِي كَسَانِي هَذَا الثَّوْبَ وَرَزَقَنِيهِ مِنْ غَيْرِ حَوْلٍ مِنِّي وَلَا قُوَّةٍ» ”حمد اس اللہ کی جس نے مجھے یہ کپڑا پہنایا اور بغیر میری کسی کوشش اور قوت کے مجھے یہ عنایت فرمایا“ تو اس کے اگلے اور پچھلے (سب) گناہ بخش دیے جاتے ہیں۔“ [سنن ابي داود/كِتَاب اللِّبَاسِ/حدیث: 4023]