جناب علاء بن عبدالرحمن اپنے والد سے روایت کرتے ہیں، انہوں نے کہا کہ میں نے سیدنا ابو سعید خدری رضی اللہ عنہ سے تہبند کے متعلق دریافت کیا، تو انہوں نے کہا: ”صاحبِ علم و خبر سے تمہارا واسطہ پڑا ہے۔“ رسول اللہ صلی اللہ علیہ وسلم نے فرمایا ہے: ”مسلمان کا تہبند آدھی پنڈلی تک ہوتا ہے۔ آدھی پنڈلی سے ٹخنوں تک کے مابین میں کوئی حرج نہیں اور جو ٹخنوں سے نیچے ہو وہ آگ میں ہے، جس نے تکبر سے اپنا تہبند گھسیٹا اللہ تعالیٰ اس کی طرف نہیں دیکھے گا۔“ [سنن ابي داود/كِتَاب اللِّبَاسِ/حدیث: 4093]

سیدنا سالم بن عبداللہ بن عمر رضی اللہ عنہ اپنے والد سے روایت کرتے ہیں کہ نبی کریم صلی اللہ علیہ وسلم نے فرمایا: ” «الْإِسْبَالُ» ”اسبال“ یعنی (حد سے زیادہ) کپڑا لٹکانا تہبند، قمیص اور پگڑی سبھی میں (ممنوع) ہے۔ جس نے تکبر سے ان میں سے کچھ بھی لٹکایا تو قیامت کے روز اللہ تعالیٰ اس کی طرف نظر نہیں کرے گا۔“ [سنن ابي داود/كِتَاب اللِّبَاسِ/حدیث: 4094]

سیدنا عبداللہ بن عمر رضی اللہ عنہما کہا کرتے تھے کہ ”رسول اللہ صلی اللہ علیہ وسلم نے جو کچھ تہبند کے بارے میں فرمایا ہے، قمیص کے بارے میں بھی اس کا یہی حکم ہے۔“ [سنن ابي داود/كِتَاب اللِّبَاسِ/حدیث: 4095]

جناب عکرمہ رحمہ اللہ کہتے ہیں کہ میں نے سیدنا ابن عباس رضی اللہ عنہما کو تہبند باندھے دیکھا کہ ان کے تہبند کا اگلا حاشیہ ان کے پاؤں کی پشت کو چھو رہا ہوتا اور پیچھے کی جانب سے اوپر کو اٹھا ہوتا تھا۔ میں نے کہا: ”آپ تہبند اس انداز سے کیوں باندھتے ہیں؟“ انہوں نے کہا: ”میں نے رسول اللہ صلی اللہ علیہ وسلم کو اسی طرح باندھتے دیکھا ہے۔“ [سنن ابي داود/كِتَاب اللِّبَاسِ/حدیث: 4096]