سیدنا علی رضی اللہ عنہ نے (مرفوعاً) اور ابوسلمہ بن عبدالرحمن نے (مرسلاً) بیان کیا کہ ”نبی کریم صلی اللہ علیہ وسلم انگوٹھی دائیں ہاتھ میں پہنا کرتے تھے۔“ [سنن ابي داود/كِتَاب الْخَاتَمِ/حدیث: 4226]

سیدنا ابن عمر رضی اللہ عنہ سے مروی ہے کہ نبی کریم صلی اللہ علیہ وسلم بائیں ہاتھ میں انگوٹھی پہنا کرتے تھے اور اس کا نگینہ اندر ہتھیلی کی جانب ہوا کرتا تھا۔ امام ابوداؤد رحمہ اللہ نے کہا کہ ابن اسحاق اور اسامہ بن زید نے نافع سے مذکورہ سند سے یہ روایت کیا: ”دائیں ہاتھ میں پہنا کرتے تھے۔“ [سنن ابي داود/كِتَاب الْخَاتَمِ/حدیث: 4227]

نافع بیان کرتے ہیں کہ ”سیدنا ابن عمر رضی اللہ عنہ اپنی انگوٹھی بائیں ہاتھ میں پہنا کرتے تھے۔“ [سنن ابي داود/كِتَاب الْخَاتَمِ/حدیث: 4228]

محمد بن اسحاق نے روایت کیا، انہوں نے کہا کہ میں نے صلت بن عبداللہ بن نوفل بن عبدالمطلب کو دیکھا کہ انہوں نے اپنے دائیں ہاتھ کی چھنگلیا میں انگوٹھی پہنی ہوئی تھی۔ میں نے کہا: ”یہ کیا؟“ انہوں نے کہا: ”میں نے سیدنا ابن عباس رضی اللہ عنہ کو دیکھا کہ وہ اپنی انگوٹھی اسی طرح پہنا کرتے تھے اور اس کا نگینہ باہر کی طرف رکھتے تھے۔“ اور سیدنا ابن عباس رضی اللہ عنہ کے متعلق خیال کیا جاتا ہے کہ وہ کہتے تھے کہ ”رسول اللہ صلی اللہ علیہ وسلم اپنی انگوٹھی ایسے ہی پہنا کرتے تھے۔“ [سنن ابي داود/كِتَاب الْخَاتَمِ/حدیث: 4229]