سیدنا معاویہ بن ابوسفیان رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”(شرابی) جب شراب پئیں تو انہیں درے لگاؤ، پھر اگر پئیں تو درے لگاؤ، پھر اگر پئیں تو درے لگاؤ، پھر اگر پئیں تو قتل کر دو۔“ [سنن ابي داود/كِتَاب الْحُدُودِ/حدیث: 4482]

جناب نافع نے سیدنا ابن عمر رضی اللہ عنہ سے روایت کیا کہ رسول اللہ صلی اللہ علیہ وسلم نے فرمایا، اور مذکورہ بالا کے ہم معنی روایت کیا۔ انہوں نے کہا: ”میرا خیال ہے کہ پانچویں بار آپ صلی اللہ علیہ وسلم نے فرمایا: ”اگر پھر پیے تو اسے قتل کر دو۔“”امام ابوداؤد رحمہ اللہ کہتے ہیں کہ ”ابوغطیف کی روایت میں بھی پانچویں بار کا ذکر ہے۔“ [سنن ابي داود/كِتَاب الْحُدُودِ/حدیث: 4483]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب وہ نشے سے مست ہو تو اسے درے لگاؤ، پھر اگر مست ہو تو درے لگاؤ، پھر اگر مست ہو تو درے لگاؤ، اگر چوتھی بار اعادہ کرے، تو اسے قتل کر دو۔“ امام ابوداؤد رحمہ اللہ فرماتے ہیں کہ عمر بن ابی سلمہ کی روایت میں بھی ایسے ہی ہے جو وہ اپنے والد سے، وہ سیدنا ابوہریرہ رضی اللہ عنہ سے اور وہ نبی کریم صلی اللہ علیہ وسلم سے روایت کرتے ہیں: ”جب وہ شراب پیے تو اسے کوڑے لگاؤ اگر چوتھی بار پیے تو اسے قتل کر دو۔“ امام ابوداؤد رحمہ اللہ کہتے ہیں کہ «سُهَيْلٌ عَنْ أَبِي صَالِحٍ عَنْ أَبِي هُرَيْرَةَ عَنِ النَّبِيِّ صلی اللہ علیہ وسلم » کی سند سے بھی یہ مروی ہے: ”اگر چوتھی بار پییں تو انہیں قتل کر دو۔“ ایسے ہی ابن ابی نعم کی روایت میں ہے جو بواسطہ سیدنا عبداللہ بن عمر رضی اللہ عنہما نبی کریم صلی اللہ علیہ وسلم سے نقل ہوئی ہے۔ اسی طرح سیدنا عبداللہ بن عمرو رضی اللہ عنہما اور سیدنا شرید رضی اللہ عنہ نے نبی کریم صلی اللہ علیہ وسلم سے روایت کیا ہے۔ اور جدلی (عبد بن عبد) کی روایت جو بواسطہ سیدنا معاویہ رضی اللہ عنہ نبی کریم صلی اللہ علیہ وسلم سے منقول ہے اس میں ہے: ”اگر تیسری یا چوتھی بار پیے تو اسے قتل کر دو۔“ [سنن ابي داود/كِتَاب الْحُدُودِ/حدیث: 4484]

سیدنا قبیصہ بن ذویب رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”جو شراب پیے تو اسے کوڑے لگاؤ، اگر پھر پیے تو کوڑے لگاؤ، اگر پھر تیسری یا چوتھی بار پیے تو اسے قتل کر دو۔“ پھر آپ کے پاس ایک آدمی لایا گیا جس نے شراب پی تھی تو آپ نے اسے کوڑے لگائے۔ پھر دوبارہ لایا گیا تو کوڑے لگائے، پھر لایا گیا تو کوڑے لگائے، پھر لایا گیا تو کوڑے لگائے اور قتل چھوڑ دیا تو اس طرح قتل سے رخصت مل گئی۔ سفیان کہتے ہیں کہ زہری نے یہ روایت اس وقت بیان کی جب منصور بن معتمر اور مخول بن راشد ان کے پاس بیٹھے تھے۔ زہری نے ان سے کہا: ”اہل عراق کے پاس یہ حدیث تحفہ لے جانا۔“ امام ابوداؤد رحمہ اللہ فرماتے ہیں: ”اس روایت کو شرید بن سوید، شرحبیل بن اوس، عبداللہ بن عمرو، عبداللہ بن عمر، ابو غطیف کندی اور ابوسلمہ بن عبدالرحمٰن نے سیدنا ابوہریرہ رضی اللہ عنہ کے واسطے سے نقل کیا ہے۔“ [سنن ابي داود/كِتَاب الْحُدُودِ/حدیث: 4485]

امیر المؤمنین سیدنا علی رضی اللہ عنہ کہتے ہیں کہ: ”میں کسی پر حد قائم کروں (اور وہ مر جائے) تو کسی کی دیت نہ دوں سوائے شراب نوش کے۔ بلاشبہ رسول اللہ صلی اللہ علیہ وسلم نے اس میں کوئی حد متعین نہیں فرمائی تھی۔ یہ حد ہم نے (مشورے سے) طے کی ہے۔“ [سنن ابي داود/كِتَاب الْحُدُودِ/حدیث: 4486]

سیدنا عبدالرحمٰن بن ازہر رضی اللہ عنہ سے روایت ہے، وہ کہتے ہیں: ”گویا کہ میں اب بھی رسول اللہ صلی اللہ علیہ وسلم کو دیکھ رہا ہوں، آپ صلی اللہ علیہ وسلم پالانوں میں کھڑے سیدنا خالد بن ولید رضی اللہ عنہ کا پالان تلاش کر رہے تھے کہ اچانک آپ صلی اللہ علیہ وسلم کے پاس ایک آدمی لایا گیا جس نے شراب پی رکھی تھی۔ آپ صلی اللہ علیہ وسلم نے لوگوں سے کہا: ”اس کو مارو۔“ چنانچہ بعض نے اس کو جوتوں سے مارا، بعض نے لاٹھی سے اور بعض نے «مِيتَخَة» سے۔ ابن وہب نے وضاحت کی کہ ”اس سے مراد کھجور کی تروتازہ چھڑی ہے۔“ پھر رسول اللہ صلی اللہ علیہ وسلم نے زمین سے کچھ مٹی لی اور اس کے منہ پر ماری۔“ [سنن ابي داود/كِتَاب الْحُدُودِ/حدیث: 4487]

جناب عبداللہ بن عبدالرحمٰن بن ازہر اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم کے پاس ایک شرابی لایا گیا جبکہ آپ صلی اللہ علیہ وسلم حنین میں تھے تو آپ صلی اللہ علیہ وسلم نے اس کے منہ پر مٹی ماری۔ پھر آپ صلی اللہ علیہ وسلم نے اپنے صحابہ رضی اللہ عنہم سے فرمایا تو انہوں نے اس کو جوتوں سے اور جو ان کے ہاتھ میں تھا اس سے مارا، حتیٰ کہ آپ صلی اللہ علیہ وسلم نے فرمایا: ”بس کرو۔“ تو وہ رک گئے۔ پھر رسول اللہ صلی اللہ علیہ وسلم کی وفات ہو گئی تو سیدنا ابوبکر رضی اللہ عنہ نے شراب پینے پر چالیس ضربیں لگائیں۔ پھر سیدنا عمر رضی اللہ عنہ نے بھی اپنے ابتدائی دور میں چالیس ضربیں ہی لگائیں اور آخری دور میں اسی لگانے لگے۔ پھر سیدنا عثمان رضی اللہ عنہ نے دونوں طرح عمل کیا، اسی بھی اور چالیس بھی۔ پھر سیدنا معاویہ رضی اللہ عنہ نے یہ حد اسی (80) دروں پر پختہ کر دی۔ [سنن ابي داود/كِتَاب الْحُدُودِ/حدیث: 4488]

سیدنا عبدالرحمٰن بن ازہر رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کو فتح مکہ کی صبح کو دیکھا، میں اس موقع پر خوب جوان تھا، آپ صلی اللہ علیہ وسلم لوگوں کے درمیان میں سے جا رہے تھے اور سیدنا خالد بن ولید رضی اللہ عنہ کا پڑاؤ دریافت فرما رہے تھے کہ ایک شرابی آپ صلی اللہ علیہ وسلم کے پاس لایا گیا۔ تو آپ صلی اللہ علیہ وسلم نے لوگوں کو حکم دیا تو انہوں نے اس کو جو ان کے ہاتھ میں تھا، مارا۔ بعض نے کوڑا مارا، بعض نے لاٹھی ماری، بعض نے اپنا جوتا مارا اور رسول اللہ صلی اللہ علیہ وسلم نے اس پر مٹی پھینکی۔“ پھر جب سیدنا ابوبکر رضی اللہ عنہ کا دور آیا تو ایک شراب نوش لایا گیا، تو انہوں نے صحابہ سے نبی کریم صلی اللہ علیہ وسلم کا عمل دریافت فرمایا کہ انہوں نے کس قدر مارا تھا۔ تو انہوں نے اس کا اندازہ چالیس ضربوں کا لگایا۔ چنانچہ سیدنا ابوبکر رضی اللہ عنہ نے چالیس ضربیں لگائیں۔ پھر جب سیدنا عمر رضی اللہ عنہ کا دور آیا تو سیدنا خالد بن ولید رضی اللہ عنہ نے ان کو لکھا کہ لوگ شراب پینے میں منہمک ہو گئے ہیں اور اس حد اور سزا کو وہ معمولی سمجھتے ہیں۔ انہوں نے کہا: ”صحابہ کرام آپ کے پاس ہیں ان سے دریافت کیجیے۔“ اور آپ کے پاس دورِ اول کے مہاجر صحابہ موجود تھے، تو آپ نے ان سے مشورہ کیا۔ انہوں نے اتفاق کیا کہ ایسے لوگوں کو اسی (80) ضربیں لگائی جائیں۔ سیدنا علی رضی اللہ عنہ نے کہا: ”تحقیق شرابی جب شراب پیتا ہے تو جھوٹ بولتا اور تہمت لگاتا ہے، سو میں سمجھتا ہوں کہ اس حد کو تہمت کی حد کی مانند کر دیا جائے۔“ امام ابوداؤد رحمہ اللہ فرماتے ہیں کہ: ”عقیل بن خالد نے اس روایت کی سند میں زہری اور عبدالرحمٰن بن ازہر کے مابین «عَبْدُ اللَّهِ بْنِ عَبْدِ الرَّحْمَنِ بْنِ أَزْهَرَ عَنْ أَبِيهِ» ”عبداللہ بن عبدالرحمٰن بن ازہر عن ابیہ“ کا اضافہ کر دیا ہے۔“ [سنن ابي داود/كِتَاب الْحُدُودِ/حدیث: 4489]