حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم ایک جنازے میں شریک تھے۔ حضرت عمر رضی اللہ عنہ نے ایک خاتون کو دیکھا (جو رو رہی تھی) تو اسے بلند آواز سے منع کیا۔ نبی صلی اللہ علیہ وسلم نے فرمایا: ”عمر! اسے رونے دو، آنکھوں سے آنسو بہتے ہیں، دل کو غم پہنچا ہے اور وقت زیادہ نہیں گزرا (غم تازہ ہے۔)“ [سنن ابن ماجه/كتاب الجنائز/حدیث: 1587]

حضرت اسامہ بن زید رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کی ایک صاحبزادی (حضرت زینب رضی اللہ عنہا) کا ایک بیٹا (حضرت علی بن ابو العاص بن ربیع رضی اللہ عنہ) حالتِ نزع میں تھا۔ انہوں نے رسول اللہ صلی اللہ علیہ وسلم کو پیغام بھیجا کہ تشریف لائیں۔ نبی صلی اللہ علیہ وسلم نے پیغام بھیجا کہ (حضرت زینب رضی اللہ عنہا کو کہہ دیں:) «إِنَّ لِلَّهِ مَا أَخَذَ، وَلَهُ مَا أَعْطَى، وَكُلُّ شَيْءٍ عِنْدَهُ بِأَجَلٍ مُسَمًّى، فَلْتَصْبِرْ وَلْتَحْتَسِبْ» ”اللہ ہی کا ہے جو وہ لے لے اور اسی کا ہے جو وہ دے دے اور اس کے پاس ہر چیز کی ایک مدت مقرر ہے، اس لیے (حضرت زینب رضی اللہ عنہا کو چاہیے کہ) وہ صبر کریں اور اللہ سے ثواب کی امید رکھیں۔“ انہوں نے قسم دی (کہ نبی صلی اللہ علیہ وسلم ضرور تشریف لائیں۔) چنانچہ رسول اللہ صلی اللہ علیہ وسلم اٹھ کھڑے ہوئے، آپ صلی اللہ علیہ وسلم کے ساتھ میں بھی تھا اور حضرت معاذ بن جبل، حضرت ابی بن کعب اور حضرت عبادہ بن صامت رضی اللہ عنہم بھی روانہ ہوئے، جب ہم ان کے ہاں پہنچے تو بچے کو رسول اللہ صلی اللہ علیہ وسلم کی خدمت میں پہنچایا گیا جب کہ بچے کی جان اس کے سینے میں تھی (سانس اکھڑ چکا تھا، معلوم ہوتا تھا آخری وقت ہے) راوی نے غالباً یہ بھی کہا: یوں لگتا تھا کہ جیسے پرانی مشک ہے (جس طرح اس میں پانی حرکت کرتا ہے، اس طرح سانس مشکل سے آ رہا تھا) رسول اللہ صلی اللہ علیہ وسلم اشکبار ہو گئے، حضرت عبادہ بن صامت رضی اللہ عنہ نے (تعجب سے) کہا: ”اللہ کے رسول! یہ کیا؟“ رسول اللہ صلی اللہ علیہ وسلم نے فرمایا: ”یہ وہ رحمت ہے جو اللہ تعالیٰ نے بنی آدم میں رکھی ہے اور اللہ بھی اپنے ان بندوں پر رحم کرتا ہے جو (دوسروں پر) رحم کرنے والے ہوتے ہیں۔“ [سنن ابن ماجه/كتاب الجنائز/حدیث: 1588]

حضرت اسماء بنت یزید رضی اللہ عنہا سے روایت ہے، انہوں نے فرمایا: ”جب اللہ کے رسول صلی اللہ علیہ وسلم کے فرزند ابراہیم رضی اللہ عنہ کی وفات ہوئی تو رسول اللہ صلی اللہ علیہ وسلم رو پڑے۔ تعزیت کرنے والے ایک صاحب ابوبکر یا عمر رضی اللہ عنہ نے کہا: ”آپ کی یہ شان ہے کہ آپ اللہ کے حق کی عظمت کا سب سے زیادہ خیال رکھنے والے ہیں۔“ رسول اللہ صلی اللہ علیہ وسلم نے فرمایا: ”آنکھوں سے آنسو بہتے ہیں، دل غمگین ہے، (لیکن) ہم وہ الفاظ نہیں کہیں گے جن سے اللہ ناراض ہو، اگر یہ بات نہ ہوتی کہ یہ (موت) ایک سچا وعدہ ہے (جس سے مفر نہیں) اور اس وعدہ کی چیز (موت) کی وجہ سے سب (عالم آخرت میں) اکٹھے ہونے والے ہیں اور بعد والا بھی پہلے والے کے پیچھے جانے والا ہے تو اے ابراہیم! ہمیں (اب) جتنا غم ہوا ہے اس سے کہیں زیادہ ہوتا اور ہم تیری وجہ سے یقیناً غمگین ہیں۔““ [سنن ابن ماجه/كتاب الجنائز/حدیث: 1589]

حضرت محمد بن عبداللہ بن جحش نے (اپنی پھوپھی) حمنہ بنت جحش رضی اللہ عنہا کے بارے میں بیان فرمایا کہ (غزوہٴ احد کے موقع پر) انہیں کہا گیا: ”آپ کے بھائی جان (عبداللہ بن جحش رضی اللہ عنہ) شہید ہوگئے۔“ انہوں نے فرمایا: ”اللہ تعالیٰ ان پر رحمت فرمائے ﴿إِنَّا لِلَّهِ وَإِنَّا إِلَيْهِ رَاجِعُونَ﴾ [سورة البقرة: 156] ۔“ (کچھ دیر بعد) لوگوں نے انہیں کہا: ”آپ کے خاوند (مصعب بن عمیر رضی اللہ عنہ) شہید ہوگئے۔“ ان کے منہ سے نکلا: ”ہائے میرا غم!“ رسول اللہ صلی اللہ علیہ وسلم نے فرمایا: ”عورت کو خاوند سے جو قلبی تعلق ہوتا ہے وہ اور کسی سے نہیں ہوتا۔“ [سنن ابن ماجه/كتاب الجنائز/حدیث: 1590]

حضرت عبداللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم قبیلہ بنو عبدالاشہل کی عورتوں کے پاس سے گزرے، وہ جنگِ احد میں شہید ہونے والے اپنے اقارب پر رو رہی تھیں تو رسول اللہ صلی اللہ علیہ وسلم نے فرمایا: ”لیکن حضرت حمزہ رضی اللہ عنہ پر رونے والیاں کوئی نہیں۔“ (یہ سن کر) انصار کی خواتین آکر حضرت حمزہ رضی اللہ عنہ پر رونے لگیں۔ رسول اللہ صلی اللہ علیہ وسلم بیدار ہوئے تو فرمایا: ”افسوس! یہ ابھی واپس نہیں گئیں۔ انہیں حکم دو کہ واپس چلی جائیں اور آج کے بعد کسی مرنے والے پر نہ روئیں۔“ [سنن ابن ماجه/كتاب الجنائز/حدیث: 1591]

حضرت عبداللہ بن ابی اوفی رضی اللہ عنہ سے روایت ہے، انہوں نے فرمایا: ”اللہ کے رسول صلی اللہ علیہ وسلم نے مرثیہ گوئی سے منع فرمایا۔“ [سنن ابن ماجه/كتاب الجنائز/حدیث: 1592]